Katër anëtarë të familjes shqiptare Kola humbën jetën në Itali nga helmimi me monoksid karboni në banesën e tyre në Toskanë. Tragjedia u zbulua pas një telefonate në numrin e emergjencës 112 nga djali 22-vjeçar i familjes, i cili raportoi se motra e tij 15-vjeçare ishte pa ndjenja.
Për shkak të një gabimi në adresë, ambulanca nuk arriti t’i gjente me kohë, dhe trupat u zbuluan rreth dy orë më vonë nga policia. Hetimet paraprake tregojnë se shkak ishte një rrjedhje monoksidi karboni nga kaldaja e re e shtëpisë.
Apartamenti është sekuestruar dhe autoritetet po hetojnë nëse rrjedhja u shkaktua nga probleme në instalim apo mirëmbajtje, si dhe kush e kishte instaluar kaldajën. Familja jetonte në Itali prej pesë vitesh dhe ishte zhvendosur në këtë banesë vetëm pesë muaj më parë.
