Veterinerët sot protestojnë para AUV-së dhe Qeverisë

Shkup, 9 nëntor, Zhurnal.mk – Të punësuarit në sektorin e shëndetësisë veterinare sot do të dalin në protestë paqësore për shkak të gjendjes së rëndë në sektor, financimit të pamjaftueshëm dhe ngecjes në zbatimin e masave parandaluese për mbrojtjen e shëndetit të kafshëve.

Tubimi do të fillojë në orën 13:00 para Agjencisë së Ushqimit dhe Veterinarisë (AUV), ndërsa në orën 14:00 është paralajmëruar protestë para Qeverisë.

Nisma është ndërmarrë nga mjekët veterinarë të ambulancave dhe klinikave që zbatojnë masat parandaluese në terren, me mbështetjen e Odës së Veterinerëve të Maqedonisë. Ata theksojnë mungesën e mjeteve buxhetore për mbrojtjen shëndetësore të kafshëve, veçanërisht gjatë dy viteve të fundit, si dhe, sipas tyre, trajtimin e papërshtatshëm institucional të profesionit.

Oda thekson se gjatë periudhës së kaluar, përmes takimeve dhe shkresave, vazhdimisht i ka njoftuar institucionet kompetente për problemet dhe nevojën për financim të duhur dhe kushte të përshtatshme pune. Ata kërkojnë hapa urgjentë për vazhdimin e punës në terren dhe zgjidhje sistematike që do të mundësojnë zbatimin e rregullt dhe pa pengesa të masave parandaluese.

Oda e Veterinerëve ka paralajmëruar se të gjitha kërkesat e paraqitura gjatë protestës do t’ua dorëzojë institucioneve kompetente.