Uashington/Tetovë, 10 prill Zhurnal.mk – Kryetari i Komunës së Tetovës, Bilall Kasami, dhe kryetari i BDI-së, Ali Ahmeti, kanë shprehur ngushëllime për ndarjen nga jeta të ish-kongresmenit shqiptaro-amerikan, Eliot Engel, i njohur si një mik i madh i shqiptarëve dhe mbështetës i vazhdueshëm i kauzës shqiptare në Shtetet e Bashkuara të Amerikës.
Kasami, përmes një postimi në profilin e tij, ka theksuar se Engel ka qenë një mik i madh i shqiptarëve dhe një kontribuues i zëshëm për çështjen shqiptare në SHBA.
“Me keqardhje e mora lajmin për ndarjen nga jeta të ish-kongresmenit amerikan, Eliot Engel. Engel ishte një mik i madh i shqiptarëve dhe kontribuues i zëshëm për kauzën shqiptare në SHBA. Faleminderit Eliot! Ngushëllime familjes dhe miqve të tij!”, ka shkruar Kasami.
Ndërkohë, edhe kryetari i BDI-së, Ali Ahmeti, ka reaguar duke e cilësuar Engel si një nga miqtë më të mëdhenj të shqiptarëve, i cili për më shumë se tre dekada ka mbështetur çështjen shqiptare në Kongresin amerikan.
Ahmeti ka theksuar se Engel do të kujtohet ndër gjenerata si një figurë e jashtëzakonshme, që ka dhënë kontribut në proceset politike në Maqedoninë e Veriut, Kosovë, Shqipëri, Luginë, Mal të Zi dhe diasporë.
Ai shton se shqiptarët do të mbeten përjetësisht mirënjohës për mbështetjen e tij të vazhdueshme dhe angazhimin në momentet kyçe për çështjen shqiptare.
Eliot Engel është vlerësuar gjerësisht në rajon për rolin e tij të rëndësishëm në mbështetjen e proceseve demokratike dhe të drejtave të shqiptarëve në Ballkan.
