Shkup, 14 prill, Zhurnal.mk – Një punonjës policie në Stacionin Policor të Strumicës, me inicialet K.Sh., është i dyshuar për veprën penale “keqpërdorim i detyrës dhe autoritetit zyrtar”. Gjyqtari i procedurës paraprake tashmë ka caktuar masa kujdesi ndaj tij.
Departamenti për Kontroll të Brendshëm në MPB ka dorëzuar padi penale me procedurë të shpejtë në Prokurorinë për Ndjekjen e Krimit të Organizuar dhe Korrupsionit. Paralelisht, do të kërkohet nisja e procedurës disiplinore dhe largimi i tij i menjëhershëm nga vendi i punës deri në përfundim të rastit.
Sipas njoftimit nga MPB, polici K.Sh., ditën e shtunë (11 prill), teksa po trajtonte zyrtarisht një denoncim për prishje të rendit dhe qetësisë publike me sulm fizik, ka shfrytëzuar pozicionin e tij për të ndërmjetësuar një “zgjidhje të qetë” mes palëve. Ai u ka kërkuar atyre para në këmbim të tërheqjes së denoncimit.
Pjesëmarrësit në konflikt kishin rënë dakord që pala denoncuese të paguante 1.000 euro për dëmshpërblim, por polici K.Sh. me iniciativën e tij e ka rritur shumën edhe për 200 euro të tjera, me pretendimin se ato ishin “shpenzime të procedurës”. Nga shuma totale prej 1.200 eurosh, polici i ka dorëzuar të dëmtuarit vetëm 700 euro, ndërsa pjesën tjetër prej 500 eurosh e ka mbajtur për vete, duke përfituar në mënyrë të paligjshme.
