Tiranë, 16 prill Zhurnal.mk – Gazetarja e njohur e kronikës, Klodiana Lala, i ka kërkuar ish-presidentit të Republikës, Bamir Topi, që të sqarojë akuzat publike që janë bërë ndër vite ndaj tij për transferimin e gjyqtarëve.
Në një postim në Facebook, Lala shkruan se në kohën kur Topi ishte President dhe njëherazi kreu i KLD-së, ka pasur zëra që ai merrte 200 mijë euro për transferimet e gjyqtarëve nga rrethet në Tiranë.
Gazetarja shton se ish-presidenti, meqenëse thotë se ka qenë garant i Kushtetutës, duhet të dalë dhe t’i sqarojë këto çështje.
Postimi i plotë:
Në kohën kur President ishte Bamir Topi, që njëherazi drejtonte edhe KLD-në, zëra të ndryshëm në atë kohë pretendonin se një gjyqtar paguante 200 mijë euro për t’u transferuar nga rrethet në Tiranë. Nuk po ngre akuzë ndaj askujt, por meqë del e flet se ka qenë garant i Kushtetutës, ka mundësinë ta sqarojë edhe këtë çështje!
