Uashington, 25 maj, Zhurnal.mk – Presidenti amerikan Donald Trump u bëri sot thirrje të vendeve me shumicë myslimane, përfshirë Arabinë Saudite, Katarin dhe Pakistanin, që të normalizojnë marrëdhëniet me Izraeli në kuadër të një marrëveshjeje paqeje lidhur me Iranin.
Në një mesazh të gjatë në rrjetet sociale, presidenti Trump renditi vendet me udhëheqësit e të cilave kishte biseduar të shtunën si pjesë e përpjekjeve për t’i dhënë fund luftës me Iranin.
“Kam deklaruar se, pas gjithë punës që kanë bërë Shtetet e Bashkuara të Amerikës për të ndihmuar në zgjidhjen e kësaj situate shumë komplekse, të gjitha këto vende duhet të jenë të detyruara, të paktën, të nënshkruajnë njëkohësisht Marrëveshjet e Abrahamit”, shkroi ai.
Marrëveshjet e Abrahamit u ndërmjetësuan nga SHBA-ja gjatë mandatit të parë të Trumpit dhe çuan në normalizimin e marrëdhënieve të Izraelit me disa vende arabe, përfshirë Emiratet e Bashkuara Arabe dhe Bahreinin.
Presidenti Trump e ka konsideruar prej kohësh zgjerimin e këtyre marrëveshjeve si një nga objektivat kryesore të politikës së tij në Lindjen e Mesme.
