Shkup, 21 korrik, Zhurnal.mk – Uji në Gostivar nuk guxon të përdoret as për pije, as për përgatitje ushqimi. Ndalimi mbetet në fuqi derisa analizat laboratorike të konfirmojnë sigurinë e tij, njoftoi drejtori i Agjencisë së Ushqimit dhe Veterinarisë, Oliver Milanov, e cila e vendosi ndalimin menjëherë pas raportimeve për ndotje. Milanov pret që në afatin më të shkurtër qytetarët të furnizohen me ujë teknik dhe ujë të pijshëm, ndërsa tashmë i është kërkuar Komunës së Gostivarit të kryejë deklorim dhe dearsenizim. Por ajo që deklaroi, e cila nuk përputhet me situatën reale, është se AUV më 13 korrik kishte marrë raport nga Qendra e Shëndetit Publik – Gostivar se uji ishte i sigurt për pije, raporton 360shkallë, transmeton Zhurnal.
“Raporti i fundit për ujin në Gostivar është nga 13 korriku i këtij viti dhe atëherë uji ka qenë i sigurt për pije”, deklaroi Milanov.
Kjo ngre pyetjen se si është dorëzuar një raport i tillë, nëse hetimi i Prokurorisë ka konstatuar se në rrjetin e ujësjellësit pompa ilegale kanë injektuar ujë me fekale, të cilin qytetarët e kanë konsumuar nga 25 qershori deri më 16 korrik.
Sipas Prokurorisë, më 25 qershor punonjësve të ndërmarrjes u është dhënë urdhër të vendosin tre pompa zhytëse në një kanal me ujë sipërfaqësor me materie të dëmshme, pranë dhomës së prurjes së ujit të pijshëm, për të testuar presionin e ujit. Më 16 korrik, gjatë kontrollit në terren, është konstatuar se dy nga pompat zhytëse ende ishin në funksion dhe përmes tubave të presionit injektonin ujë me materie të dëmshme – baktere koliforme – nga një kanal i hapur në dhomën ku ndodhet uji i pijshëm me cilësi të përcaktuar në sistem të mbyllur.
Gazeta “Sloboden Pechat” publikoi se një mendim profesional i Qendrës së Shëndetit Publik – Tetovë, i përgatitur më 29 qershor, kishte treguar se “uji i plotëson kërkesat ligjore dhe profesionale për parametrat e analizës bakteriologjike dhe fiziko‑kimike”, ndërsa tani flitet për një raport të ri.
Inspektorët e AUV-së që nga dje janë në terren, ndërsa Milanov paralajmëroi gjoba për të gjithë ata që nuk përdorin ujë teknik, duke pasur parasysh dëshmitë e qytetarëve se restorantet dhe kafeteritë vazhdojnë të punojnë dhe se mbahen dasma.
Ai theksoi se AUV ka zgjeruar ndjeshëm aktivitetet, duke marrë mostra nga i gjithë sistemi i furnizimit me ujë, përfshirë institucionet publike, kopshtet, objektet e gastronomisë dhe të gjitha subjektet që përdorin ujë nga ky sistem për pije dhe përgatitje ushqimi. Agjencia paralajmëron masa ndaj çdo subjekti ku do të konstatohet shkelje ose mosrespektim i detyrimeve ligjore.
Dje janë marrë mostra nga një çezmë publike në Gostivar, nga dy kopshtet, nga Spitali i Përgjithshëm, nga një restorant, si dhe nga çezma në kishë dhe xhami. Rezultatet priten nga Instituti i Shëndetit Publik.
Qëllimi i masave të jashtëzakonshme është të përcaktohet saktësisht burimi i kontaminimit, shkalla dhe përmasa e ndotjes, si dhe të sigurohen rezultate të reja laboratorike mbi bazën e të cilave do të ndërmerren masat e mëtejshme.
Pas njoftimit nga Prokuroria dhe raportimit të MPB-së – Gostivar, shërbimet inspektuese të AUV-së kanë kryer kontroll të jashtëzakonshëm në sistemin e furnizimit me ujë në Vrutok. Kontrolli është kryer më 16 korrik në orët e vona, në bashkëpunim me Ministrinë e Mjedisit, Prokurorinë Publike – Gostivar dhe krim-teknikën e MPB-së. Është konstatuar se në tubacionin kryesor të rrjetit të ujësjellësit, ilegalisht dhe pa leje, ishin vendosur pompa që injektonin ujë nga lumi Vardar në sistem.
Drejtoresha e Inspektoratit të Mjedisit, Ivana Ginovska, deklaroi se që nga viti 2021 nuk është konstatuar se operatori – ndërmarrja “Komunalec” – ka shkelur lejen, ndërsa pompat ishin vendosur ilegalisht 800–900 metra larg tubacionit kryesor, gjë që nuk ka mundur të parandalohet me asnjë masë të zakonshme.
Ministri i Mjedisit dhe Planifikimit Hapësinor, Muamet Hoxha, e quajti incidentin në Gostivar tepër serioz dhe kërkoi përcaktimin e përgjegjësisë penale dhe morale për të gjithë të përfshirët.
Ai theksoi se furnizimi me ujë të pijshëm, mirëmbajtja e sistemeve të ujësjellësit dhe mbrojtja e zonave sanitare janë kompetencë ligjore e komunave dhe ndërmarrjeve publike komunale, ndërsa kontrolli i cilësisë së ujit është detyrim i qendrave të shëndetit publik.
Prokuroria njoftoi se qytetarët e Gostivarit kanë konsumuar ujë të kontaminuar me fekale 48 herë mbi kufirin e lejuar. Pompat që injektonin ujë të ndotur në rrjetin qendror ishin vendosur më 26 qershor 2026 dhe kanë funksionuar deri më 16 korrik, kur nisi hetimi. Gjatë gjithë këtyre 20 ditëve, qytetarët kanë pirë, janë larë dhe kanë përdorur në amvisëri ujë të kontaminuar.
Të dyshuar janë:
Artana Asani, drejtoreshë e NP “Komunalec” – Gostivar
Leon Nuredini, udhëheqës teknik i sektorit të punëve teknike
Vadedin Dervishi, udhëheqës i sektorit të ujësjellësit, kanalizimit dhe punëve ndërtimore
Ata dyshohen se me veprimet e tyre kanë bërë të papërdorshëm ujin e pijshëm në dhomën e prurjes së sistemit që furnizon Komunën e Gostivarit dhe disa fshatra përreth.
