Barcelona po shqyrton mundësinë e transferimit të kapitenit të Liverpoolit, Virgil van Dijk, verën e ardhshme, kur mbrojtësi holandez mund të largohet nga “Anfield” si lojtar i lirë.
Qendërmbrojtësi 35-vjeçar është një nga figurat kryesore të Liverpoolit që prej transferimit nga Southampton në janar të vitit 2018, për rreth 86 milionë euro.
Gjatë kësaj periudhe, ai ka regjistruar 383 paraqitje me fanellën e “Të Kuqve”, duke shënuar 36 gola dhe duke luajtur rol të rëndësishëm në sukseset e klubit nën drejtimin e Jurgen Kloppit.
Në vitin 2025, Van Dijk nënshkroi një kontratë të re dyvjeçare me Liverpoolin, por tashmë kanë mbetur më pak se 12 muaj deri në përfundimin e saj. Nëse nuk arrihet një marrëveshje e re, holandezi mund të largohet pa kompensim në verën e ardhshme.
Sipas mediumit katalunas El Nacional, Barcelona e ka përfshirë Van Dijkun në listën e kandidatëve për përforcimin e qendrës së mbrojtjes. Trajneri Hansi Flick po shqyrton mundësinë që përvoja e kapitenit të Liverpoolit të ndihmojë talentin e ri Pau Cubarsi, i cili është shndërruar në një nga lojtarët më premtues të klubit katalunas.
Raportimi sugjeron se Van Dijk mund të jetë një partner ideal për Cubarsin, duke i ofruar përvojën e nevojshme për të vazhduar zhvillimin. Megjithatë, nëse realizohet, transferimi nuk pritet të jetë një zgjidhje afatgjatë për Barcelonën.
“Për Hansi Flickun, profili i tij do të kishte kuptim, duke marrë parasysh karakteristikat dhe përvojën e lojtarit”.
“Cubarsi është tashmë i përgatitur për të udhëhequr mbrojtjen e Barcelonës, por klubi vazhdon të kërkojë një qendërmbrojtës që mund ta plotësojë dhe ta ndihmojë të zhvillohet edhe më tej”, thuhet në raportim.
Pengesa kryesore për realizimin e marrëveshjes mund të jetë paga e Van Dijkut, i cili vazhdon të jetë ndër futbollistët më të paguar të Liverpoolit.
