Shkup, 20 tetor, Zhurnal.mk -Udhëheqësia e LSDM-së gjithnjë e më shumë i ngjan një sekti, në të cilin parakushti kryesor për përkatësi është slogani – të gjithë të tjerët janë fajtorë për humbjet, vetëm Venko Filipçe nuk mban përgjegjësi për asgjë, thonë organizatorët e „Bisedave për të ardhmen në 12:05“, si reagim ndaj konferencës për shtyp të kandidatit për kryetar komune nga LSDM-ja në Komunën e Bërvenicës, Jovica Radeski.
„Filipçe e sakrifikon edhe një herë shokun Jovica Radeski. Sot, e kanë detyruar shokun Jovica Radeski të dalë në konferencë për shtyp vetëm sepse ne e përgëzuam për paraqitjen e tij dinjitoze në zgjedhje. I kanë kërkuar që t’ua dëshmojë besnikërinë. I kërkojmë falje për faktin që sot u desh të turpërohej publikisht dhe të kërkonte falje privatisht. E ftojmë publikisht udhëheqësinë që të dalë me të paktën një emër dhe mbiemër të një personi që i përket „Bisedave për të ardhmen në 12:05“, i cili gjoja ka bërë fushatë kundër kandidatit të LSDM-së në Bërvenicë“, thuhet në reagimin me shkrim.
Së fundi, vijon reagimi, nëse nga „Bisedat për të ardhmen në 12:05“ varet nëse kandidatët e LSDM-së fitojnë, atëherë kjo udhëheqësi partiake e çorientuar vetë pranon se duhet të largohet.
„Asnjë konferencë për shtyp e detyruar nuk mund ta mbulojë të vërtetën se Venko Filipçe është i autorizuari për pazarin më të ndyrë politik në 35 vitet e fundit. Anëtarësia e ndershme gjithnjë e më shumë po turpërohet që udhëheqësia aktuale i shërben Hristijan Mickoskit“, thonë nga „Bisedat për të ardhmen në 12:05“.
