Shkup, 20 gusht, Zhurnal.mk – Shëndetësia në Maqedoninë e Veriut vazhdon të karakterizohet nga problemet strukturore të thella, kriza të vazhdueshme në furnizimin me terapi, mungesë serioze të kuadrit mjekësor si dhe për akuza për korrupsion. Fatkeqësisht shëndetësia në Maqedoninë e Veriut kërkon vëmendje urgjente dhe investime reale, shkruan “Zhurnal.mk”.
Mungesë e investimeve
Investimet e realizuara deri më tani në shëndetësinë e Maqedonisë së Veriut nuk janë të mjaftueshme për të mbuluar nevojat reale të popullsisë dhe për të ndalur krizën strukturore të sistemit. Edhe pse në Buxhetin e vitit 2026 qeveria ka alokuar fonde për rritjen e investimeve kapitale dhe stabilizimin e sektorit, hendeku midis premtimeve dhe realitetit mbetet i madh.
Për shkak të pamundësisë së spitaleve vendase për të kryer ndërhyrje komplekse, fondet e ndara për mjekim jashtë shtetit janë rritur ndjeshëm, duke arritur në rreth 483 milionë denarë.
Janë ndërmarrë disa iniciativa për rritjen e pagave të personelit mjekësor me qëllim zbutjen e krizës së kuadrit.
Përkundër rritjeve të vogla të pagave, me qindra mjekë dhe infermierë vazhdojnë të largohen drejt sektorit privat ose jashtë vendit çdo vit, sepse kushtet e punës mbeten në nivele të ulëta.
Spitalet publike shpesh përballen me mungesa të barnave bazë dhe materialeve konsumuese, gjë që i detyron pacientët t’i blejnë ato privatisht.
Historikisht, shteti ka treguar vështirësi në menaxhimin dhe realizimin e plotë të fondeve të parapara për infrastrukturën spitalore, duke mos i shpenzuar siç duhet paratë e ndara në letër, shkruan “Zhurnal.mk”.
Projekti për Qendrën e re Klinike mbetet i bllokuar
Projekti për Qendrën e re Klinike në Shkup ka mbetur i bllokuar për vite me radhë dhe vazhdon të jetë kryesisht një premtim i parealizuar politik. Megjithatë, përgjatë vitit 2026, ka pasur lëvizje të reja lidhur me ndryshimin e lokacionit dhe planeve për ndërtimin e saj.
Kryeministri Hristijan Mickoski propozoi një plan të ri, duke sugjeruar që Qendra e re Klinike të ndërtohet afër sallës “Boris Trajkovski” në Shkup. Ky propozim zëvendëson idetë e vjetra për ndërtim në zonat e Gjorçe Petrovit apo në periferi të tjera.
Projekti ka nisur si ide që nga viti 2010. Edhe pse në vitin 2019 u njoftua sigurimi i kredive nga Banka Qendrore Evropiane, ndërtimi nuk filloi kurrë për shkak të ndryshimeve politike, burokracisë dhe mosmarrëveshjeve për koston.
Për shkak të vonesave të Qendrës së re, autoritetet kanë nisur disa investime të tjera për të menaxhuar mbingarkesën.
Spitali i Përgjithshëm i Qytetit “8 Shtatori” po transformohet në një qendër rajonale për të lehtësuar fluksin e pacientëve nga Shkupi, Kumanova dhe Velesi. Janë ndërmarrë projekte për modernizimin e klinikave ekzistuese, si Klinika e Urologjisë në Shkup. Për të zgjidhur kaosin e parkimit në kompleksin ekzistues “Nënë Tereza”, është përzgjedhur kompania që do të ndërtojë garazhe të reja në kate, shkruan “Zhurnal.mk”.
Duhet modernizim urgjent të spitaleve
Mungesa e investimeve dhe problemet e thella strukturore dëmtojnë cilësinë e shërbimeve mjekësore. Largimi i stafit mjekësor drejt shteteve të tjera lë spitalet pa numrin e mjaftueshëm të specialistëve, ndërsa pajisjet e vjetruara dhe krizat në furnizimin me barna rrezikojnë jetën e pacientëve çdo ditë.
Përmirësimi i këtij sektori ndihmon në ndalimin e largimit të mjekëve dhe rrit mirëqenien e qytetarëve.
Prandaj, rritja e buxhetit shtetëror për shëndetësinë publike dhe modernizimin e spitaleve duhet të jetë një nga temat kryesore në vend. Nevojiten kushte më të mira dhe paga më të larta për mjekët dhe infermierët për t’i mbajtur ata në vend. Gjithashtu duhet që të ketë menaxhim më të mirë të fondeve dhe sigurimi i barnave esenciale pa ndërprerje, shkruan “Zhurnal.mk”.
