Shkup, 22 tetor, Zhurnal.mk – Sipas raportimeve të TV24, në vend të Petrovskës pritet të emërohet deputetja Jovana Trençevska. Vendimi vjen pas mbështetjes së Petrovskës për “Platformën 12:05”, e cila ka kërkuar dorëheqjen e kryetarit të LSDM-së, Venko Filipçe.
Kryetari i LSDM-së, Venko Filipçe, ka marrë vendim për shkarkimin e deputetes Slavjanka Petrovska nga pozita e zëvendëskoordinatores së grupit parlamentar të kësaj partie në Kuvend, raportojnë mediat maqedonase.
Sipas informacioneve të publikuara nga TV24, Filipçe i ka njoftuar disa deputetë gjatë koordinimit të sotëm se udhëheqësia e LSDM-së, me të në krye, ka vendosur ta largojë Petrovskën nga kjo pozitë.
Sipas të njëjtit burim, Filipçe e ka ngarkuar koordinatorin e grupit parlamentar, Oliver Spasovskin, që t’i dërgojë një shkresë kryetarit të Kuvendit, Afrim Gashit, për zbatimin e vendimit. Në vend të Petrovskës pritet të emërohet deputetja Jovana Trençevska, e cila është edhe nënkryetare e LSDM-së.
Sipas procedurës, shkresa duhet të nënshkruhet nga të gjithë deputetët e grupit parlamentar, përfshirë edhe vetë Petrovskën.
Kërkohet debat për vendimin
Sipas raportimit të TV24, disa deputetë kanë këmbëngulur që për këtë vendim të zhvillohet debat. Kjo për shkak se, sipas praktikës së deritanishme, zëvendëskoordinatorët caktohen nga koordinatori i grupit parlamentar, ndërsa Spasovski, sipas burimit, nuk është konsultuar për këtë çështje.
Filipçe, pasi e ka komunikuar vendimin, është larguar nga takimi, duke thënë se kishte obligime të tjera.
Sipas informacioneve jozyrtare të TV24, Petrovska e ka nënshkruar shkresën, por ka kërkuar shpjegim për arsyet e vendimit. Megjithatë, Filipçe nuk ka qenë i pranishëm për t’ia dhënë sqarimin, ndërsa Trençevska ka deklaruar vetëm se “arsyet janë të njohura”.
Vendimi pas përplasjes me “Platformën 12:05”
Largimi i Petrovskës nga posti i zëvendëskoordinatores vjen pas mbështetjes së saj për “Platformën 12:05” dhe përfshirjes në mesin e organizatorëve të saj. Kjo platformë ka kërkuar dorëheqjen e Filipçes, duke e akuzuar se po vepron në interes të Qeverisë së udhëhequr nga Hristijan Mickoski dhe se po e mban LSDM-në “në peng” për shkak të lirisë së tij personale.
Nga ana tjetër, Filipçe, pas takimit të parë të organizuar në kuadër të nismës “Biseda për të ardhmen në 12:05”, ku morën pjesë edhe intelektualë të pavarur, avokatë dhe aktivistë, i ka cilësuar pjesëmarrësit si njerëz që punojnë për VMRO-DPMNE-në dhe si pjesë të asaj që e quajti “Platforma ZNAM 2.0”.
Përplasje edhe për akuzat ndaj Petrovskës
Sipas raportimit, Petrovska në një paraqitje publike e ka akuzuar Filipçen për kriminalitet gjatë kohës kur ai ishte ministër i Shëndetësisë. Pas këtyre deklaratave, VMRO-DPMNE ka kërkuar që Prokuroria Themelore Publike të hapë lëndë dhe që Filipçe të japë deklaratë.
Ndërkohë, Petrovska, së bashku me Ivanovskin, Naçevskin, Petrov, Stankoviqin, Georgievin dhe të tjerë, i kanë paraqitur Filipçes një plan për reforma brenda LSDM-së, i cili përfshinte edhe kërkesën për dorëheqjen e tij. Ata e kanë akuzuar kryetarin se e ka kapur partinë dhe po e mban atë nën kontroll.
Zhvillimet e fundit tregojnë për përplasje të thella brenda LSDM-së, në një periudhë kur një pjesë e anëtarëve dhe funksionarëve kërkojnë ndryshime në udhëheqjen dhe funksionimin e partisë.
