Shkup, 9 qershor, Zhurnal.mk – Duke filluar nga viti 2027, Gjermania do të zbatojë ndryshime të rëndësishme në sistemin e kursimeve private për pension, të cilat mund të ndikojnë tek qindra mijëra qytetarë nga Ballkani që punojnë në këtë vend. Modeli i ri sjell më shumë mundësi për fitim përmes investimeve në fonde dhe ETF, por edhe një nivel të caktuar rreziku, ndërsa pensioni i mëparshëm Riester shkon në histori, shkruan Fenix.magazin, transmeton Zhurnal.
Risia kryesore është futja e depos së pensionit (Altersvorsorgdepot), e cila u mundëson kursimtarëve të investojnë në fonde dhe ETF të gjerë e të diversifikuar (si indeksi MSCI World). Ndryshe nga sistemi i vjetër, modeli i ri nuk kërkon garanci 100% për kontributet e paguara, gjë që hap mundësi për fitim më të madh, por sjell edhe rrezik nga luhatjet e tregut.
Sistemi i ri ofron tre opsione kryesore për kursim: depo pensioni, produkt standard dhe produkte të garantuara. Përveç të punësuarve dhe nëpunësve shtetërorë, kursimet e reja për herë të parë mund t’i përdorin të gjithë punëtorët e pavarur (freelancerët), pa marrë parasysh nëse janë të siguruar domosdoshmërisht në sistemin ligjor të pensioneve.
Reforma nuk hyn menjëherë në fuqi, por është e ndarë në disa faza. Nga 1 janari 2027, qytetarët do të mund të vendosin nëse duan t’i transferojnë mjetet e tyre në modelin e ri, potencialisht më fitimprurës, pa detyrim për kthimin e stimujve shtetërorë të mëparshëm, edhe pse tranzicioni mund të shkaktojë disa shpenzime administrative. /Zhurnal.mk
