Shkup, 21 korrik, Zhurnal.mk – Qyteti i Shkupit është i përgatitur për motin e rëndë të paralajmëruar, njoftoi kryetari i Shkupit, Orce Gjorgjievski, përmes një publikimi në “Facebook”, të shoqëruar me fotografi nga pastrimi i pusetave dhe kanaleve kulluese nëpër qytet.
Ai mori kritika të forta nga qytetarët dhe opozita pas motit të keq në fillim të muajit, kur transporti publik u ndërpre, disa lagje të Shkupit të lidhura përmes nënkalimeve dhe rrethrrotullimeve mbetën të izoluara nga qyteti dhe u raportuan qindra raste përmbytjesh.
“Ekipet e NP ‘Ujësjellësi dhe Kanalizimi’ – Shkup sot, ashtu si çdo ditë në vazhdimësi, po kryejnë pastrim intensiv të linjës së kanalizimit, pusetave dhe kanaleve kulluese, me qëllim të sigurimit të pranimit dhe largimit të pandërprerë të ujërave atmosferikë dhe uljes së rrezikut nga përmbytjet në pikat kritike të qytetit. Sipas paralajmërimeve të SHMU, në orët e pasdites pritet mot i rëndë. Shtabi i Krizave i Qytetit të Shkupit ka mbajtur mbledhje, është plotësisht i mobilizuar dhe ekipet do të jenë vazhdimisht në terren, të gatshme të ndërhyjnë me kohë dhe të përballen me pasojat e mundshme”, tha kryetari Gjorgjievski.
Ai u bëri thirrje qytetarëve të mos hedhin mbeturina në pusetat, kanalet kulluese dhe hapësirat publike, pasi ato bllokojnë qarkullimin e ujit dhe pengojnë largimin e duhur të ujërave të shiut.
“Qyteti i Shkupit mbetet vigjilent, i mobilizuar dhe plotësisht në shërbim të qytetarëve”, theksoi kryetari në prag të motit të keq.
Administrata Hidrometeorologjike paralajmëroi për pasdite reshje të dendura shiu, bubullima, erë të fortë dhe kushte për mot të rëndë të shkurtër me breshër. E njëjta situatë u parashikua edhe më 1 korrik, kur moti i shkurtër i keq shndërroi shumë rrugë të qytetit në pellgje të mëdha.
