Goditet grupi kriminal shqiptar në Itali, dyshohet për trafikimin e 240 kilogramëve kokainë

Autoritetet italiane kanë goditur një organizatë kriminale, kryesisht me shtetas shqiptarë, të dyshuar për trafik ndërkombëtar droge dhe pastrim parash.

Sipas mediumit italian “Il Giorno”, operacioni “Caveau 38” u zhvillua nga Guardia di Finanza, në bashkëpunim me SPAK-un shqiptar.

Hetuesit dyshojnë se grupi trafikoi rreth 240 kilogramë kokainë gjatë viteve 2019–2022, ndërsa mbi 14 milionë euro u transferuan drejt Shqipërisë.

Në kuadër të hetimeve janë identifikuar 52 persona, gjashtë prej të cilëve u arrestuan në flagrancë.

Autoritetet sekuestruan mbi 1.5 milion euro para të gatshme dhe rreth 32 kilogramë drogë, përfshirë kokainë, heroinë dhe kanabis.