Romë, 4 qershor Zhurnal.mk – Italia ka hedhur një hap të rëndësishëm drejt rikthimit të energjisë bërthamore. Dhoma e Deputetëve miratoi ligjin kuadër që i hap rrugën qeverisë të hartojë rregullat për prodhimin e energjisë bërthamore, kërkimin shkencor dhe menaxhimin e mbetjeve radioaktive.
Projektligji mori 155 vota pro dhe 86 kundër, ndërsa tashmë pritet shqyrtimi dhe miratimi përfundimtar në Senat.
Pas kalimit në të dyja dhomat e Parlamentit, qeveria do të ketë kompetenca më të gjera për zhvillimin e sektorit bërthamor civil. Ministri i Mjedisit dhe Sigurisë Energjetike, Gilberto Pichetto Fratin, deklaroi se dekretet zbatuese të kësaj kornize ligjore pritet të jenë gati deri në fund të vitit.
Sipas tij, reaktorët e parë funksionalë në Itali mund të nisin punën gjatë viteve 2034 dhe 2035. Ai theksoi se qëllimi është garantimi i sigurisë energjetike të vendit për dekadat e ardhshme.
Ministri sqaroi se projektligji lidhet vetëm me përdorimin civil të energjisë bërthamore dhe jo me qëllime ushtarake.
Sipas tij, kërkesa për energji do të rritet ndjeshëm në vitet e ardhshme për shkak të zhvillimit të industrisë dhe qendrave të të dhënave.
Për këtë arsye, Italia synon të kombinojë energjinë bërthamore me burimet e rinovueshme dhe hidrogjenin për të përballuar nevojat e ardhshme energjetike.
