Kina i ka bërë thirrje bashkësisë ndërkombëtare të krijojë një sistem të drejtë, të barabartë dhe gjithëpërfshirës të qeverisjes globale të të drejtave të njeriut, të drejtuar nga Nisma e Qeverisjes Globale.
Jia Guide, përfaqësuesi i përhershëm i Kinës në Zyrën e OKB-së në Gjenevë dhe në organizata të tjera ndërkombëtare në Zvicër, i tha këto të mërkurën në një deklaratë të përbashkët me titull “Përmirësimi i Qeverisjes Ndërkombëtare të të Drejtave të Njeriut”, të bërë në emër të 71 vendeve në sesionin e 63-të të Këshillit të të Drejtave të Njeriut të OKB-së.
Jia vuri në dukje në deklaratën e përbashkët se aktualisht situata ndërkombëtare po kalon ndryshime të thella, mjedisi ndërkombëtar është kompleks e i trazuar, ndërsa qeverisja globale e të drejtave të njeriut po përballet me rregullime të thella.
Ai paraqiti katër propozime të palës kineze:
Së pari, vendosja e njeriut në qendër. Popujt e vendeve të ndryshme kanë të drejtën të vlerësojnë dhe përmirësojnë gjendjen e vet të të drejtave të njeriut.
Së dyti, ruajtja e barazisë sovrane. Të gjitha vendet duhet të marrin pjesë, të marrin vendime dhe të ndajnë rezultatet në mënyrë të barabartë.
Së treti, ruajtja e barazisë dhe drejtësisë. Kina e kundërshton politizimin dhe instrumentalizimin e të drejtave të njeriut.
Së katërti, ruajtja e ligjit ndërkombëtar. Kina mbështet parimet e Kartës së OKB-së, siguron zbatimin e barabartë të ligjit e të rregullave ndërkombëtare dhe kundërshton standardet e dyfishta dhe ndërhyrjen në punët e brendshme të vendeve të tjera nën pretekstin e të drejtave të njeriut, si edhe imponimin e standardeve të një vendi ndaj vendeve të tjera.
