Shkup, 10 nëntor Zhurnal.mk – Rregulla komplekse, gjithnjë e më shumë detyrime administrative dhe gjoba shtesë. Kontabilistët kërkojnë ndryshime urgjente në rregullativë dhe thjeshtimin e rregullave për raportimin financiar, veçanërisht për ndërmarrjet mikro, të vogla dhe të mesme.
Sipas tyre, zgjidhjet aktuale ligjore nuk janë të përshtatura me madhësinë dhe kapacitetet e kompanive, për shkak të së cilës bizneset e vogla përballen pothuajse me të njëjtat kërkesa administrative si korporatat e mëdha, raporton 4news.mk.
Problem i veçantë, siç theksojnë ata, është rregullorja e re për mbajtjen e kontabilitetit, e cila përmban plot 1.200 faqe. Kontabilistët vlerësojnë se rregullativa kaq voluminoze e ndërlikon edhe më shumë punën e tyre dhe krijon presion të panevojshëm administrativ mbi kompanitë më të vogla.
Përfaqësuesit e këtij profesioni reagojnë se vazhdimisht u imponohen detyrime dhe sanksione të reja, ndërsa vërejtjet, propozimet dhe të drejtat e tyre profesionale mbeten në plan të dytë.
Ata kërkojnë më shumë fleksibilitet nga institucionet kompetente, si dhe përfshirje aktive të kontabilistëve dhe komunitetit të biznesit gjatë përgatitjes dhe miratimit të zgjidhjeve ligjore.
Me rastin e Ditës Ndërkombëtare të Kontabilitetit, u theksua edhe nevoja për forcimin e statusit të këtij profesioni, i cili po përballet me plakjen e kuadrit dhe mungesën e profesionistëve të rinj.
Kontabilistët paralajmërojnë se pa reforma të përshtatshme dhe kushte më të mira pune, sfidat në këtë profesion do të thellohen edhe më tej, ndonëse ai ka rol kyç në funksionimin e kompanive dhe ekonomisë.
