Uashington, 6 mars – Konfirmohet partneriteti dhe bashkëpunimi tridhjetëvjeçar mes Armatës së Maqedonisë së Veriut dhe forcave të armatosura të SHBA-ve. Shefi i Shtabit të Përgjithshëm të Ushtrisë, gjeneral-major Sashko Lafçiski, në kuadër të vizitës së punës në Forcat e Armatosura të Shteteve të Bashkuara të Amerikës, ka takuar zëvendëskryetarin e Shefave të Shtabit të Përbashkët të Forcave të Armatosura të SHBA-së, gjeneralin Kristofer Mahoni.
Në takimin e realizuar në Pentagon, në Uashington, gjenerali Lafçiski theksoi përkushtimin e fortë të Ushtrisë ndaj sigurisë rajonale dhe globale përmes pjesëmarrjes së pjesëtarëve të Ushtrisë në operacione paqeruajtëse dhe aktivitete të NATO-s, duke theksuar pjesëmarrjen maqedonase në “Forëard Land Forces” në Republikën e Bullgarisë, Rumani dhe Republikën e Letonisë.
Gjenerali Lafçiski e informoi gjeneralin Mahoni edhe për procesin më të madh të modernizimit në historinë e Ushtrisë, duke përfshirë pajisjen me automjete të reja të lehta të blinduara, obusë modernë dhe armatim e pajisje të tjera bashkëkohore.
U theksua gjithashtu edhe stërvitja e ardhshme “Blesok 26” si prioritet i lartë kombëtar, me të cilën pritet të vlerësohet gatishmëria luftarake e Grupit të Batalionit të Këmbësorisë së Lehtë.
Me këtë rast u vu në pah edhe rëndësia e poligonit ushtarak “Krivollak”, si kapacitet strategjik që mundëson stërvitje në shkallë të gjerë. Në kuadër të takimit u diskutua edhe për sfidat dhe kërcënimet aktuale në nivel global, me theks të veçantë në përkeqësimin e situatës së sigurisë në Lindjen e Mesme, nevojën për përshtatje të vazhdueshme të kapaciteteve të Ushtrisë dhe forcimin e bashkëpunimit rajonal dhe ndërkombëtar për përballimin e kërcënimeve bashkëkohore.
