Shkup, 18 gusht – Komisioni Shtetëror Zgjedhor (KSHZ) së fundmi ka vendosur që kandidatët e pavarur për këshilltarë dhe për kryetarë komunash do të nevojiten që të kenë vetëm dy nënshkrime nga qytetarët dhe në këtë mënyrë mund të marrin pjesë në zgjedhje. Në aspektin politik, kjo tregon se kandidtatët e pavarur nuk janë aspak rrezik për partitë politike dhe se në zgjedhjet e ardhshme lokale, kryesisht do të vendosin partitë se ku do të shkojnë votat, shkruan “Zhurnal.mk”.
Gjykata Kushtetuese në maj të këtij viti shfuqizoi dy dispozita të Ligjit për Ndryshimet në Kodin Zgjedhor, të cilat përcaktonin numrin e nënshkrimeve që duheshin mbledhur qoftë për zgjedhjet parlamentare ashtu edhe për ato lokale, kur paraqitësit e një liste kandidatësh ishin një grup votuesish. Neni 18, i cili u shfuqizua nga Gjykata Kushtetuese (e cila ndryshoi nenin 62 të Kodit Zgjedhor), parashikonte që “kur paraqitësi i një liste kandidatësh për anëtarë të Këshillit, pra i një liste kandidatësh për kryetar komune, është një grup zgjedhësish, është e nevojshme të mblidhen të paktën 1% të nënshkrimeve nga zgjedhësit e regjistruar në ekstraktin nga Lista e Zgjedhësve për komunën, pra Qytetin e Shkupit”.
Mungesa e kushteve të qarta i detyroi nismat qytetare të fillonin një proces për t’u regjistruar si parti, me qëllim që të shmangnin grackat e mundshme që do t’i pengonin ato të kandidonin përfaqësuesit e tyre në minutën e fundit.
Por, kalimi nga një ekstrem në tjetrin nga 1% – në dy nënshkrime, nuk është zgjidhje. Është mirë që pjesëmarrja e iniciativave qytetare në zgjedhje po lehtësohet, por nga ana tjetër, procesi mbetet pa një “filtër” që do të parandalonte një sërë listash të paraqitura nga njerëz që thjesht duan të shkruajnë emrin e tyre në fletët e votimit.
Pa asnjë prag, ekziston rreziku i krijimit të konfuzionit midis votuesve ku do të ketë lista të gjata dhe mund të manipulohen emra të ndryshëm të politikanëve.
Kuvendi nuk ka arritur ta rregullojë këtë çështje të numrit të nënshkrimeve të nevojshme për t’i propozuar një listë kandidatësh një grupi votuesish, dhe për shkak të kësaj, KSHZ-ja, pa asnjë faj të vetin, është vënë në një situatë të zbatimit të dispozitave të Kodit Zgjedhor ashtu siç janë, dhe në interes të organizimit me sukses të procesit zgjedhor.
Në zgjedhjet lokale të vitit 2021, 56,000 qytetarë votuan për kandidatë të pavarur, duke sjellë kështu përfaqësuesit e tyre të pavarur në 33 komuna dhe në Qytetin e Shkupit.
Në parlament, partive politike nuk iu intereson aspak për kandidatët e pavarur. Aktualisht, kandidatë të pavarur janë paraqitur në Strugë, Kërçovë, Gostivar…, por për disa prej tyre janë shfaqur përkrahje nga partitë politke.
VLEN ka thënë se do të mbështesë Mendi Qyrën, si kandidat i pavarur për Strugën, ndërsa në Kërçovë, pritet të shihet se sa votues do të votojnë për kandidatin e pavarur, duke pasur parasysh se dy partitë kryesore shqiptare kanë kandidatët e tyre. Në Gostivar situata është e ngjashme, por do të shihet si do të luhen lojërat politike deri në fund të zgjedhjeve.
Në Shkup, shqiptarët do të votojnë kryesisht për partitë politike dhe nuk do të ketë hapësirë të madhe për kandidatët e pavarur. Tek votueist maqedonas ka më shumë grupe të ndryshme që po përgatiten për zgjedhjet lokale, dhe zakonisht këtu bëjnë pjesë fytyra publike të cilët janë të pakënaqur me VMRO DPMNE dhe LSDM.
Në përgjithësi me mundësinë që vetëm dy persona mund të kandidojnë një person për këshilltarë ose kryetar komune, hapet një kuti e pandorës e shpërndarjes së votave, hajgare me listat e kandidatëve dhe lista të gjata kilometrike që nuk do t’i zënë kutitë zgjedhore!, shkruan “Zhurnal.mk”.