Shkup, 10 nëntor, Zhurnal.mk – Kryetari i Komunës së Çairit, Izet Mexhiti, ka pritur sot në një takim zyrtar ambasadorin e ri të Republikës së Turqisë në Maqedoninë e Veriut, Shkëlqesinë e Tij, Alper Aktaş.
Gjatë takimit, Mexhiti theksoi marrëdhëniet tradicionale dhe miqësore që lidhin Maqedoninë e Veriut dhe Turqinë, duke nënvizuar rëndësinë e bashkëpunimit të deritanishëm ndërmjet dy vendeve në fusha të ndryshme.
“Maqedoninë e Veriut dhe Turqinë i bashkojnë lidhje të hershme kulturore dhe një traditë bashkëpunimi institucional. E vlerësoj kontributin e deritanishëm të institucioneve turke në vendin tonë dhe besoj se gjatë mandatit të ambasadorit Aktaş do të kemi mundësi ta thellojmë bashkëpunimin mes dy vendeve”, ka deklaruar Mexhiti.
Ai e falënderoi ambasadorin turk për vizitën në Komunën e Çairit, duke i uruar suksese në misionin e tij diplomatik.
Takimi u vlerësua si një mundësi për forcimin e mëtejshëm të marrëdhënieve ndërmjet institucioneve lokale dhe atyre turke, si dhe për thellimin e bashkëpunimit në projekte me interes të përbashkët.
