Këngëtarja e njohur shqiptare Shkëndije Mujaj ka përmbushur një nga obligimet më të mëdha fetare për myslimanët, duke kryer Haxhin në vendet e shenjta në Arabinë Saudite.
Përmes një rrëfimi emocional të publikuar në rrjetet sociale, Shkëndije Mujaj tregoi momentet e veçanta gjatë Ditës së Arafatit, ku mes temperaturave të larta dhe turmave të mëdha të besimtarëve, arriti të ngjitet në Jabal ar-Rahmah – i njohur si Mali i Mëshirës.
Ajo përshkroi sfidat që hasi gjatë rrugës, duke treguar se kishte vendosur të nisej e vetme drejt malit, edhe pse shumë persona i kishin thënë se hyrja ishte e pamundur për shkak të turmës së madhe.
“Nëse çdo kush thotë ‘jo’, e Allahu thotë ‘po’, Ai ta gjen një rrugë aty ku nuk e paramendon kurrë”, shkroi Mujaj në mesazhin e saj prekës.
Këngëtarja rrëfeu se pasi mbërriti pranë hyrjes së mbyllur, bëri lutje dhe arriti të hyjë në vendin e shenjtë, duke e cilësuar gjithë përjetimin si një mrekulli dhe një shenjë të mëshirës së Zotit.
Postimi i saj është shpërndarë dhe komentuar gjerësisht nga ndjekësit, të cilët e kanë uruar për kryerjen e Haxhit dhe për ndryshimin shpirtëror që ajo reflektoi në mesazhin e saj.
