Shkup, 28 shtator, Zhurnal.mk – Presidentja e RMV-së, Gordana Siljanovska-Davkova në fjalimin e saj në Samitin e 22-të Evropian në Salzburg, në sesionin me temën “A është Evropa (ende) një lojtar global?”, tha se asnjë vend evropian në rrugën e tij të integrimit nuk ka mbajtur një barrë kaq të rëndë sa Maqedonia.
“Asnjë vend evropian në rrugën e tij të integrimit nuk ka mbajtur një barrë kaq të rëndë sa ne: ndryshuam flamurin shtetëror, emrin kushtetues dhe miratuam 36 amendamente kushtetuese, shumica e të cilave të diktuara nga jashtë, theksoi Gordana Siljanovska-Davkova.
Ajo foli për të ardhmen e projektit evropian, sfidat strategjike me të cilat përballet Bashkimi Evropian dhe nevojën për të përshpejtuar integrimin evropian të Ballkanit Perëndimor si një çështje mbi të cilën Bashkimi ka kontroll të plotë dhe fuqi vendimmarrëse.
Duke iu referuar rrugës evropiane të vendit, Presidentja kujtoi se nga 35 vjet pavarësi, kemi qenë kandidat për anëtarësim në Bashkimin Evropian për plot 21 vjet, me 17 raporte pozitive për fillimin e negociatave, një shkallë të lartë harmonizimi me legjislacionin evropian dhe njëqind për qind përputhshmëri me politikën e përbashkët të jashtme dhe të sigurisë, si dhe se vendi është ndër më të suksesshmit në reformat evropiane dhe në zbatimin e Planit të Rritjes së Ballkanit Perëndimor.
“Detyrimi i një shteti për të ndryshuar strukturën e tij të brendshme ligjore për të zgjidhur një mosmarrëveshje historike ngre pyetje serioze në lidhje me qëndrueshmërinë e parimeve evropiane. Neni 4(2) i Traktatit të BE-së e detyron Bashkimin të respektojë barazinë e Shteteve Anëtare dhe identitetet e tyre kombëtare, siç mishërohen në strukturat e tyre themelore politike dhe kushtetuese. E megjithatë, në rastin tonë, një ndryshim kushtetues i kushtëzuar nga një mosmarrëveshje historike dypalëshe paraqitet si një provë e kapacitetit tonë demokratik”, tha Siljanovska-Davkova.
