Sylvester Stallone ka folur hapur për rivalitetin e gjatë me Arnold Schwarzenegger, i cili zgjati për më shumë se dy dekada. Edhe pse për shumë vite u mendua se përplasja mes dy yjeve të filmave aksion ishte thjesht pjesë e imazhit të tyre në Hollywood, Stallone ka konfirmuar se për një periudhë mes tyre kishte vërtet një armiqësi të fortë.
Gjithçka nisi në ceremoninë e ndarjes së çmimeve Golden Globes në vitin 1977. Filmi i Stallones, “Rocky”, fitoi çmimin për filmin më të mirë dramatik, por aktori nuk arriti të fitonte disa prej çmimeve individuale për të cilat ishte nominuar.
Sipas Stallones, Schwarzenegger, të cilin në atë kohë pothuajse nuk e njihte, e kishte ngacmuar gjatë mbrëmjes.
Në një moment, aktori thotë se e humbi durimin, mori një vazo të madhe me lule dhe e hodhi në drejtim të Schwarzeneggerit. Sipas tij, ky incident shënoi fillimin e rivalitetit të gjatë mes dy aktorëve.
Foto: Profimedia
Në kulmin e karrierave të tyre, dy yjet e filmave aksion konkurronin për të njëjtat role dhe përpiqeshin vazhdimisht të tejkalonin njëri-tjetrin.
Stallone e ka krahasuar marrëdhënien e tyre me disa prej rivaliteteve më të mëdha që kanë shënuar historinë.
“E shihni atë ashpërsi. Ai ishte armiku im i betuar. E njëjta gjë ishte edhe me Arnoldin. Ishim në një konflikt serioz, nuk ishte shaka. Ishte si çështje jete a vdekjeje. Duhej të përfundonim bashkë në Koloseun e Romës”, ka thënë Stallone për “The Sunday Times”.
Megjithatë, aktori beson se pikërisht ky rivalitet i shtynte të dy të bëheshin më të mirë.
“Është si kur një luftëtar e ofendon tjetrin dhe ai stërvitet edhe më fort për ta mposhtur. Ne absolutisht kishim nevojë për njëri-tjetrin”, është shprehur ai.
Stallone ka folur edhe më herët për marrëdhënien me Schwarzeneggerin. Në vitin 2022, ai pranoi se kishte pasur një periudhë kur të dy “nuk duronin dot as të qëndronin në të njëjtën dhomë”.
Foto: Profimedia
Megjithatë, marrëdhënia e tyre ndryshoi me kalimin e viteve. Një prej momenteve që ndikoi në afrimin e tyre ishte themelimi i përbashkët i zinxhirit të restoranteve “Planet Hollywood”.
Schwarzenegger ka treguar se në atë periudhë e kishte tejkaluar tashmë fazën e rivalitetit dhe se ideja, e cila iu ishte propozuar nga avokatët e tyre të përbashkët, iu duk shumë e mirë.
Më vonë, dy aktorët luajtën së bashku edhe në katër filma të serisë “The Expendables”.
Stallone u shfaq gjithashtu në dokumentarin e Netflix, “Arnold”, të publikuar në vitin 2023, ku foli me vlerësim për ish-rivalin e tij, duke e cilësuar Schwarzeneggerin si “superior” dhe si dikë që “kishte përgjigje për gjithçka”.
Edhe Arnold Schwarzenegger ka folur për këtë marrëdhënie. Vitin e kaluar, gjatë një interviste në emisionin radiofonik të Andy Cohen në SiriusXM, ai konfirmoi se për një periudhë të caktuar të dy “e urrenin vërtet njëri-tjetrin”.
“Sulmonim njëri-tjetrin, i bënim gjëra të këqija njëri-tjetrit dhe thoshim gjëra të tmerrshme. Të gjitha këto gjëra”, kujtoi aktori.
Në themelimin e “Planet Hollywood”, i cili u hap në vitin 1991, morën pjesë edhe aktorë të tjerë të njohur, përfshirë Bruce Willis dhe Demi Moore, të cilët ishin ndër investitorët e parë.
Schwarzenegger e shiti pjesën e tij në këtë zinxhir restorantesh në vitin 2000.
