Presidentja e Komisionit Evropian, Ursula von der Leyen, deklaroi se Evropa duhet të jetë e gatshme të mbrohet “në çdo kohë”, duke paralajmëruar se rritja e tensioneve gjeopolitike dhe presioni i jashtëm mbi sistemet demokratike kërkojnë që kontinenti të forcojë pavarësinë e tij strategjike, raporton Anadolu.
Duke folur në Konferencën e Sigurisë në Mynih, von der Leyen tha se Evropa po përballet me “kërcënimin e qartë të forcave të jashtme që përpiqen të dobësojnë bashkimin tonë nga brenda”, krahas rivalitetit global në rritje që prek gjithçka, nga territori te rregullimi i teknologjisë.
“Në thelb, e gjithë kjo na çon te një realitet i thjeshtë në botën e sotme të përçarë: Evropa duhet të bëhet më e pavarur. Nuk ka alternativë tjetër”, tha ajo, duke theksuar se pavarësia duhet të përfshijë mbrojtjen, energjinë, tregtinë, lëndët e para dhe teknologjinë digjitale.
Von der Leyen hodhi poshtë sugjerimet se autonomia më e fortë evropiane mund të dobësojë lidhjet transatlantike, duke thënë se “një Evropë e pavarur është një Evropë e fortë, dhe një Evropë e fortë e bën edhe më të fortë aleancën transatlantike”.
Duke theksuar përpjekjet e bllokut në fushën e mbrojtjes që nga lufta e Rusisë në Ukrainë, ajo tha se shpenzimet ushtarake evropiane në vitin 2025 janë rritur gati 80 për qind krahasuar me nivelet para luftës.
“Ka ardhur koha që klauzola e mbrojtjes së ndërsjellë të Evropës të vihet realisht në jetë”, tha ajo, duke e përshkruar mbrojtjen kolektive sipas Nenit 42.7 të traktatit të BE-së si “jo një detyrë opsionale”, por një angazhim detyrues.
Von der Leyen bëri thirrje për vendimmarrje më të shpejtë në çështjet e sigurisë, duke sugjeruar se BE-ja mund të mbështetet gjithnjë e më shumë në votimin me shumicë të kualifikuar në vend të unanimitetit, për të përshpejtuar veprimet.
Ajo kërkoi gjithashtu bashkëpunim më të ngushtë me partnerët jashtë bllokut, veçanërisht me Mbretërinë e Bashkuar, duke thënë se “dhjetë vjet pas Brexit-it, e ardhmja jonë është më e lidhur se kurrë” dhe duke bërë thirrje për koordinim më të thellë në siguri, demokraci dhe qëndrueshmëri ekonomike.
Duke nxjerrë mësime nga përvoja e Ukrainës në fushëbetejë, theksoi ajo, kapacitetet industriale dhe inovacioni janë faktorë vendimtarë në luftërat moderne, ndërsa shtoi se dronët tani përbëjnë “rreth 80 për qind të dëmeve në fushëbetejë nga të dyja palët”.
Sipas saj, Evropa duhet të forcojë prodhimin e mbrojtjes dhe teknologjitë me përdorim të dyfishtë, si inteligjenca artificiale dhe prodhimi i avancuar.
“Disa pyesin nëse mund ta përballojmë këtë, por unë them se nuk mund të përballojmë të mos e bëjmë”, shtoi von der Leyen, duke shtuar se investimi në mbrojtje është thelbësor për të mbrojtur “paqen dhe lirinë”.
