Anëtari i Këshillit Kombëtar të PD, Ilir Alimehmeti, foli mbi aktualitetin politik dhe paralajmërimet për aksionin e opozitës që pritet të nisë në muajin shtator.
Alimehmeti tha se forumet e PD-së do të mblidhen për të diskutuar format e aksionit, ndërsa theksoi se aktualisht vëmendja është përqendruar te analiza e zgjedhjeve të 11 majit dhe raportimi i shkeljeve.
“Kemi detyrimin tonë për të informuar faktorin ndërkombëtar dhe mediat. Raporti i OSBE/ODIHR po vonon dhe është një pikë kyçe që na mungon për momentin. Fakti që vonon, tregon se ka diçka që po e pengon,” u shpreh ai në News24.
Sipas tij, protestat mbeten një komponent i rëndësishëm përballë një pushteti që ai e cilësoi “autokraci”.
“T’i qëndrosh përballë një autokracie nuk e zgjidh dot në mënyra të tjera, në një kohë kur institucionet janë të kapura. Ajo që mbetet për njerëzit është rruga e protestave. Në një vend demokratik, protestat janë të ligjëruara. Mënyra si ato organizohen, mbetet për t’u diskutuar, por unë i shoh si një element kyç,” deklaroi Alimehmeti.
