Sesioni i merkatos së janarit 2026 po mbyllet me një tjetër telenovelë të bujshme dhe protagonisti është Jean-Philippe Mateta. Sulmuesi francez i Crystal Palace ka qenë prej javësh në qendër të zërave dhe negociatave, por kur gjithçka dukej e mbyllur me Milanin, situata ka marrë një kthesë të papritur. Pas kontrolleve shtesë mjekësore, klubi kuqezi ka vendosur të tërhiqet nga operacioni, duke vënë në dyshim kushtet fizike të lojtarit.
Sipas raportimeve, Mateta nuk ka kaluar bindshëm vizitat mjekësore të kryera me mjekët e Milanit, kryesisht për shkak të shqetësimeve në gju. Edhe pse francezi ka luajtur si titullar në të 23 ndeshjet e Premier League-s këtë sezon me Crystal Palace, nga Anglia bëhet me dije se javët e fundit ai ka shfaqur dhimbje të përsëritura, aq sa nuk përjashtohet as mundësia e një ndërhyrjeje kirurgjikale për zgjidhjen përfundimtare të problemit.
Në këtë kontekst është rishfaqur Juventusi, i cili kishte tentuar më herët afrimin e sulmuesit. “Zonja e Vjetër” ka kërkuar informacion shtesë dhe, sipas Sky Sport, ka propozuar kushte të ndryshme nga ato të Milanit, konkretisht një huazim me detyrim blerjeje mbi 30 milionë euro. Megjithatë, mbetet e paqartë nëse bardhezinjtë janë realisht gati të mbyllin një marrëveshje kaq të rëndësishme në orët e fundit të merkatos, apo nëse lëvizja ishte thjesht taktike.
Skenarët mbeten të hapur. Juventusi është në kërkim të një sulmuesi dhe Mateta konsiderohet profili i duhur, por pikëpyetjet mbi gjendjen e tij fizike janë një pengesë serioze. Nëse Milani zgjodhi të tërhiqet, a do të rrezikojë Juventusi? Përgjigjja pritet shumë shpejt, ndërsa fundi i merkatos po afron.
