Bejrut, 10 prill Zhurnal.mk – Përplasjet mes ushtrisë izraelite dhe milicisë libaneze “Hezbollah” kanë vazhduar edhe të premten, pavarësisht planeve për nisjen e bisedimeve të drejtpërdrejta mes Izraelit dhe Libanit.
Hezbollahu lëshoi sërish predha drejt veriut të Izraelit në orët e mëngjesit. Mediat izraelite raportuan se një banesë u godit dhe u dëmtua nga një raketë e lëshuar nga grupi i mbështetur nga Irani.
Fillimisht, nuk pati raportime për viktima, ndërsa Hezbollahu mori përgjegjësinë për sulmin me raketa.
Ndërkohë, sulme të tjera u raportuan edhe në Liban. Agjencia shtetërore libaneze e lajmeve NNA bëri të ditur se goditjet u përqendruan veçanërisht në jug të vendit, ku të paktën një person humbi jetën.
Ministria libaneze e Shëndetësisë njoftoi se më shumë se 300 persona u vranë të mërkurën gjatë sulmeve të gjera izraelite në të gjithë Libanin. Që atëherë, intensiteti i sulmeve izraelite është ulur ndjeshëm.
Presidenti amerikan, Donald Trump deklaroi dje për rrjetin “NBC News” se kishte biseduar me kryeministrin izraelit, Benjamin Netanyahu, i cili kishte premtuar uljen e intensitetit të sulmeve.
Megjithatë, Netanyahu deklaroi më vonë se Izraeli do të vazhdonte me operacionet kundër Hezbollahut dhe nuk do të ndalej derisa të garantohej siguria e popullsisë në veri të vendit.
Një zyrtar i Departamentit Amerikan të Shtetit konfirmoi planin për zhvillimin e bisedimeve javën e ardhshme me Izraelin dhe Libanin për një armëpushim.
Sipas zyrës së Netanyahut, bisedimet pritet të fokusohen në çarmatimin e Hezbollahut – i cili ushtron ndikim të konsiderueshëm politik në Liban, ndërsa operon jashtë kontrollit të plotë shtetëror – si dhe në vendosjen e marrëdhënieve paqësore mes dy vendeve.
Media izraelite raportoi se negociatat në Uashington do të zhvillohen fillimisht në nivel ambasadorësh.
Shtetet e Bashkuara të Amerikës dhe Irani kanë rënë dakord për një armëpushim dyjavor, të mbështetur nga Izraeli, por ai mbetet i brishtë për shkak të sulmeve të vazhdueshme izraelite në Liban.
