Tiranë, 15 prill Zhurnal.mk – Ministri i Mbrojtjes, Ermal Nufi, zhvilloi në Bruksel një takim me Kryetarin e Komitetit Ushtarak të NATO-s, Giuseppe Cavo Dragone, në kuadër të forcimit të dialogut strategjik dhe thellimit të bashkëpunimit të Shqipërisë me Aleancën.
Gjatë takimit, u diskutua mbi intensifikimin e bashkëpunimit në çdo nivel institucional, si dhe mbi rolin e Shqipërisë në kuadër të NATO-s në funksion të paqes, sigurisë dhe stabilitetit rajonal.
Një vëmendje e veçantë iu kushtua Kosovës dhe rolit të misionit të KFOR-it në garantimin e stabilitetit dhe sigurisë në rajon.
“Takim i rëndësishëm me Giuseppe Cavo Dragone, Kryetar i Komitetit Ushtarak të NATO, në funksion të forcimit të dialogut strategjik dhe thellimit të bashkëpunimit të Shqipërisë me Aleancën në çdo nivel. Vëmendje e veçantë ndaj Kosovës dhe rolit të KFOR në garantimin e stabilitetit dhe paqes”, shkroi Nufi në një postim në rrjetet sociale.
Në fokus të bisedimeve ishin gjithashtu projektet strategjike me rëndësi rajonale, përfshirë Korridorin VIII dhe zhvillimin e Porto Romanos, të cilat u vlerësuan si të rëndësishme për avancimin e infrastrukturës dhe lidhshmërisë në rajon, me mbështetjen e mëtejshme të Aleancës.
“Roli strategjik të Korridori VIII dhe zhvillimii i Porto Romanos me mbështetjen e mëtejshme nga Aleanca, i rëndësishëm për avancimin e projekteve me rëndësi kombëtare dhe rajonale”, theksoi Nufi.
Nufi rikonfirmoi angazhimin e Shqipërisë për të forcuar rolin e saj në NATO dhe për të kontribuar në mënyrë aktive në garantimin e stabilitetit dhe sigurisë në rajon dhe më gjerë.
“Shqipëria mbetet e përkushtuar për të forcuar më tej rolin e saj në NATO, në funksion të paqes, sigurisë dhe stabilitetit në rajon dhe më gjerë”, theksoi Nufi
