Manchester United vazhdon të jetë i interesuar prej kohësh për mbrojtësin e Evertonit, Jarrad Branthwaite, ndërsa trajneri Michael Carrick ka nisur të mendojë për afatin kalimtar të janarit.
“Djajtë e Kuq” investuan shumë në mesfushë gjatë verës, por lanë pas dore repartin defensiv. Carrick po e ndien tashmë ndikimin e vendimit të INEOS për të mos shpenzuar më shumë për përforcime në mbrojtje.
United ka pësuar shtatë gola në katër ndeshjet e para të Ligës Premier, katër prej tyre ndaj skuadrave të sapongjitura, Hull Cityt dhe Ipswich Townit. Kjo ka nxjerrë edhe më në pah nevojën për përforcime në prapavijë para hapjes së afatit të janarit.
Sipas talkSPORT, klubi anglez po e shqyrton që tani mundësinë e transferimit të Branthwaite, për të cilin kishte shfaqur interesim edhe më herët. Në verën e vitit 2024, United kishte bërë dy oferta për qendërmbrojtësin, por të dyja ishin refuzuar nga Evertoni.
Që atëherë, zhvillimi i 24-vjeçarit u pengua nga lëndimet, të cilat e mbajtën jashtë fushave për pjesën më të madhe të sezonit 2025/26. Tani, megjithatë, ai është rikthyer në formë të plotë dhe po paraqitet në nivel të lartë në krah të James Tarkowskit.
Branthwaite ka ndihmuar Evertonin të mbajë portën e paprekur ndaj Crystal Palace dhe Tottenhamit, duke treguar jo vetëm cilësitë e tij në mbrojtje, por edhe aftësinë për ta nisur lojën me pasime të sakta.
United e vlerëson pikërisht për këto dy arsye dhe synon ta përforcojë prapavijën me të, në kuadër të një riorganizimi më të madh që planifikohet për vitin 2027.
Dy vjet më parë, Evertoni raportohej se kërkonte rreth 80 milionë euro për Branthwaite. Me kontratën që i skadon vetëm në qershor të vitit 2030, klubi mund të kërkojë një shumë të ngjashme edhe nëse United rikthehet me ofertë
