Kylian Mbappe mund të përfitojë nga një strategji e përdorur më parë nga Real Madridi për ta ndihmuar të fitojë Topin e Artë 2026, me klubin që mund të mobilizojë figura të njohura për të mbështetur publikisht yllin francez.
Sipas raportimeve të L’Equipe, Mbappe është një prej favoritëve për çmimin prestigjioz pas një sezoni të jashtëzakonshëm individual, por konkurrenca mbetet e fortë. Mes kandidatëve kryesorë janë edhe Lamine Yamal i Barcelonës, Harry Kane dhe emra të tjerë të rëndësishëm.
Gazeta franceze thekson se Reali ka përdorur edhe më parë figura me ndikim të lidhura me klubin për të forcuar kandidaturën e lojtarëve të tij në javët para ndarjes së çmimit.
Shembulli më i qartë është Cristiano Ronaldo në vitin 2013. Portugezi nuk kishte fituar ndonjë trofe madhor me klubin, ndërsa Franck Ribery i Bayern Munichut vinte pas një sezoni historik, në të cilin kishte fituar Ligën e Kampionëve, Bundesligën dhe Kupën e Gjermanisë.
Megjithatë, disa prej figurave më të rëndësishme të Real Madridit dolën publikisht në mbështetje të Ronaldos. Mes tyre ishin Alfredo Di Stefano, Emilio Butragueno, Carlo Ancelotti, Iker Casillas dhe Sergio Ramos.
Bayerni, në anën tjetër, nuk kishte të njëjtën mbështetje të unifikuar për Riberyn, ndërsa edhe Arjen Robben konsiderohej kandidat i klubit gjerman për çmimin.
Në fund, Ronaldo triumfoi me 27.99 për qind të votave, duke lënë pas Lionel Messin me 24.72 për qind dhe Riberyn me 23.36 për qind.
Tani, Reali mund të tentojë të përsërisë të njëjtën qasje për Mbappen, duke përdorur zërat me ndikim të klubit për të përforcuar kandidaturën e tij.
