Shkup, 16 shtator, Zhurnal.mk – Ministrja e Arsimit dhe Shkencës, Vesna Janevska, i hodhi poshtë akuzat e partisë Levica se Ministria po fsheh pikët për pranimin në konviktet studentore, duke theksuar se në publik po përhapen dezinformata dhe lajme të rreme. Sipas saj, janë publikuar si listat e studentëve të pranuar, ashtu edhe ato të refuzuar, me arsyetimet përkatëse.
“Është e turpshme që në publik përhapen dezinformata ose të ashtuquajtura lajme të rreme. Absolutisht pohoj, listat e rangut janë publikuar për të pranuarit, por është publikuar edhe lista e të refuzuarve me shpjegim pse nuk janë pranuar”, deklaroi Janevska.
Ajo sqaroi se janë refuzuar studentë që studiojnë në vitin e shtatë ose të tetë, si dhe ata me prindër me të ardhura shumë të larta, duke kujtuar se të gjitha kriteret janë të publikuara në shpalljen zyrtare. Në lidhje me vërejtjet për mungesë të asistentëve arsimorë, ministrja theksoi se numri i tyre është aktualisht më i larti ndonjëherë.
“Nuk ka pasur kurrë më shumë asistentë se këto vite. Në arsimin fillor ka rreth 1.380 ose 1.348 asistentë, ndërsa në të mesmin 166. Ka kërkesa shtesë për asistentë, konkursi është në zhvillim dhe përfundon nesër”, tha ajo, duke shtuar se fëmijët kanë mbështetje nga ekipet gjithëpërfshirëse.
Sa i përket shkollës fillore “Kiro Gligorov”, Janevska njoftoi se po përfundohen klasat shtesë dhe pritet që mësimi me prezencë fizike të fillojë më së voni deri të martën.
