Brahim Diaz po kalon një periudhë me më pak minuta te Real Madridi dhe kjo situatë mund të ndikojë në të ardhmen e tij në afatin kalimtar të janarit.
Sulmuesi 27-vjeçar është aktualisht në një rol dytësor në skuadrën e drejtuar nga Jose Mourinho, ndërsa Milani po e monitoron nga afër situatën dhe mund të rikthejë interesimin për transferimin e tij nëse minutat e lojës vazhdojnë të jenë të kufizuara.
Interesimi i klubit italian nuk është diçka e re, Brahim Diaz luajti për Milanin në formë huazimi për tri sezone, nga viti 2020 deri në vitin 2023, përpara se të rikthehej përfundimisht te Real Madridi.
Gjatë aventurës në San Siro, spanjolli zhvilloi 124 ndeshje zyrtare, duke shënuar 18 gola dhe dhuruar 15 asistime.
Ai ishte gjithashtu pjesë e skuadrës që fitoi titullin e Serie A në vitin 2022 dhe arriti deri në gjysmëfinale të Ligës së Kampionëve në sezonin e fundit para rikthimit në Madrid.
Që prej atëherë, Milani ka vazhduar ta ndjekë situatën e tij dhe mund të shqyrtojë sërish mundësinë e transferimit në janar. Megjithatë, pengesa kryesore mbetet qëndrimi i Real Madridit.
Mourinho e llogarit Brahimin si pjesë të skuadrës dhe e ka përdorur atë në pozicione të ndryshme, ndaj klubi madrilen nuk ka aktualisht në plan ta lejojë largimin e tij.
Megjithatë, besimi i trajnerit nuk është përkthyer në një rol të rregullt në fushë. Brahim ka regjistruar 156 minuta në tri ndeshje zyrtare këtë sezon, duke dhuruar një asistim.
Në La Liga, ai ka alternuar paraqitjet si titullar me ndeshjet ku ka qëndruar në stol. Ai ishte titullar ndaj Malagës, por nuk u aktivizua fare në sfidën pasuese ndaj Betisit, në një repart ofensiv ku konkurrenca është rritur ndjeshëm pas afrimeve të verës.
Yan Diomande, Arda Guler, Vinicius Junior, Kylian Mbappe dhe alternativat e tjera të përdorura nga Mourinho kanë zvogëluar hapësirën për Brahimin.
Për këtë arsye, minutat që do të marrë deri në dhjetor mund të jenë vendimtare për të ardhmen e tij.
Një tjetër faktor është edhe kontrata e tij, Brahim ka marrëveshje me Real Madridin deri në vitin 2027, që do të thotë se, nëse nuk rinovohet kontrata, verën e ardhshme ai do të hyjë në 12 muajt e fundit të saj.
Për momentin, largimi nuk është një skenar i vendosur, por janari mund të sjellë zhvillime të reja.
Milani pritet të vëzhgojë rolin e Brahimit gjatë muajve të ardhshëm dhe të shohë nëse Real Madridi do ta ndryshojë qëndrimin e tij.
Për Brahim Diaz, prioritet mbetet të fitojë më shumë minuta dhe të rikthehet në një rol më të rëndësishëm në skuadër.
Nëse vazhdon të ketë hapësirë të kufizuar në La Liga, rikthimi te Milani mund të bëhet sërish një mundësi konkrete kur afati kalimtar të hapet më 1 janar.
