Shkup, 30 maj Zhurnal.mk – Ish-kryeministri Nikola Gruevski, i cili u arratis në Hungari në vitin 2018 dhe menjëherë mori azil politik, ka nisur biznesin e tij privat në verën e vitit 2021 duke themeluar një kompani konsulence, raportojnë mediat hungareze. Sipas tyre, kompania është e vogël dhe nuk ka të punësuar, por ka të ardhura të qëndrueshme. Vitin e kaluar kompania ka realizuar të ardhura prej rreth 9.600 eurosh, ndërsa Gruevski ka siguruar fitim prej afërsisht 5.600 eurosh.
Përveç kompanisë së Gruevskit, ditët e fundit mediat e huaja, duke iu referuar burimeve nga qeveria hungareze, kanë shkruar se ish-kryeministri në vitin 2022 ka marrë edhe shtetësinë hungareze. Sipas tyre, kjo shtetësi e vështirëson edhe më shumë mundësinë e ekstradimit të tij në Maqedoninë e Veriut.
Analisti politik Petar Arsovski për Televizionin 24 thotë se mundësia që Gruevski të kthehet në Maqedoni është minimale, pothuajse e papërfillshme. Sipas tij, shtetësia e fituar nuk mund të hiqet lehtë, pasi për këtë ekzistojnë kushte të veçanta që duhet të plotësohen.
Petar Arsovski, analist politik:
“Gjasat që Gruevski të kthehet në Maqedoni janë minimale, praktikisht inekzistente, për disa arsye, ndër të cilat është edhe posedimi i shtetësisë hungareze. Azili politik, nga natyra e tij, është një gjendje e përkohshme juridike dhe mund të hiqet nëse ndryshojnë rrethanat në vendin e origjinës, por shtetësia, sipas Konventës Evropiane për të Drejtat e Njeriut, nuk mund të merret lehtë. Duhet të ekzistojnë arsye shumë të qarta dhe shkelje të shumta ligjore. Prandaj, probabiliteti që Gruevski të ekstradohet në Maqedoni është minimal. Kësaj i shtoj edhe deklaratën e kryeministrit Mickoski se, nëse Gruevski kthehet në Maqedoni, do të duhet të shkojë në burg, madje edhe në rast të përsëritjes së proceseve gjyqësore. Këta dy faktorë, sipas meje, e bëjnë mundësinë e kthimit të Gruevskit në Maqedoni të barabartë me zero.”
Nga Ministria e Drejtësisë, pas informacioneve se Gruevski ka shtetësi hungareze, thonë se ai mbetet shtetas i Maqedonisë së Veriut dhe vazhdon të ngarkohet me vendime gjyqësore të formës së prerë dhe procedura aktive. Ata sqarojnë se po ndërmerren të gjitha hapat dypalësh, juridikë dhe diplomatikë për ekstradimin e tij.
Ish-kryeministri është rikthyer në qendër të vëmendjes pas deklaratës së kryeministrit të sapozgjedhur të Hungarisë, Péter Magyar, i cili tha se Hungaria nuk do të jetë strehë për kriminelët ndërkombëtarë, duke përmendur edhe Nikola Gruevskin.
Gruevski ishte i akuzuar në shtatë raste gjyqësore. Nga to, vendim përfundimtar ka në rastin “Tanku”, ku u dënua me dy vjet burg. Ekzekutimi i kësaj dënimi është parashkruar në tetor të vitit 2024. Në rastin “Dhuna në Qendër” u dënua me një vit e gjysmë burg, ndërsa në rastin “Parcelat në Vodno” me 9 vjet burg. Ekzekutimi i dënimit për rastin “Dhuna në Qendër” parashkruhet në vitin 2027, ndërsa për “Parcelat në Vodno” në vitin 2043. Rastet “Trajektorja” dhe “TNT” janë parashkruar, ndërsa proceset gjyqësore për “Talir 1”, “Talir 2” dhe “Titanik” vazhdojnë.
Gruevski u arratis nga Maqedonia në vitin 2018 pas vendimit për dënimin me dy vjet burg në rastin “Tanku” dhe kërkoi azil politik në Hungari, duke shkruar në një status në Facebook se situata kishte dalë jashtë kontrollit.
