Komisioni Evropian njoftoi sot planet për një sistem emergjence për të përshpejtuar lëvizjen ndërkufitare të trupave dhe pajisjeve ushtarake në përgjigje të kërcënimeve në rritje të sigurisë nga Rusia.
“Lëvizja e shpejtë e ushtrive të Evropës është thelbësore për mbrojtjen e Evropës”, tha shefja e çështjeve të jashtme të BE-së, Kaja Kallas.
“Gatishmëria e mbrojtjes varet nga fakti nëse mund t’i dërgojmë tanket dhe trupat aty ku do të ishte e nevojshme”, tha ajo.
Sipas planeve, operacionet e transportit ushtarak do të kenë akses prioritar në rrjetet e transportit, infrastrukturën dhe shërbimet përkatëse në të gjithë Bashkimin Evropian gjatë një krize.
“Në kriza, kur koha është thelbësore për çdo përgjigje, Evropa nuk mund të reagojë ngadalë”, thuhet në propozim.
“Në situata të tilla nuk mund të mbështetemi në koordinimin ad-hoc dhe vullnetin e mirë kombëtar. Ne duhet të kemi një plan të qartë dhe një korsi të shpejtë të përgatitur për forcat tona ushtarake. Parandalimi ynë mbetet teorik”, tha Kallas.
Ministrat e BE-së dhe Parlamenti Evropian do ta shqyrtojnë dhe diskutojnë propozimin.
Nëse miratohet, sistemi mund të aktivizohet brenda 48 orëve në rast emergjence.
Propozimi i referohet si Sistemi Evropian i Reagimit të Përmirësuar të Lëvizshmërisë Ushtarake (EMERS), i cili synon – përveç shumë iniciativave të tjera – lehtësimin e transporteve ushtarake ndërkufitare.
Këto qasje përfshijnë reduktimin e pengesave burokratike dhe zgjerimin e infrastrukturës së transportit.
Aktualisht, shumë ura të rëndësishme rrugore dhe hekurudhore, si dhe porte dhe aeroporte të shumta, janë të papërshtatshme për transporte të mëdha dhe të rënda ushtarake.
Propozimi i EMERS vjen mes vlerësimeve të inteligjencës që sugjerojnë se Rusia mund të jetë ushtarakisht e aftë të nisë një luftë tjetër deri në vitin 2030.
Kallas paralajmëroi më herët, se Rusia mund të përgatitet për një sulm ndaj një vendi të BE-së në vitet që vijnë.