Prishtinë, 24 qershor, Zhurnal.mk – Kryetari i Lidhjes Demokratike të Kosovës, Lumir Abdixhiku, ka reaguar përseri mbrëm pas kërkesave për dorëheqjen e tij nga disa degë të partisë, duke bërë thirrje për durim dhe unitet brenda LDK-së.
Përmes një postimi, Abdixhiku falënderoi kryetarët e degëve, nëndegëve dhe veprimtarët e partisë për mbështetjen e dhënë, teksa siguroi se sfidat aktuale do të tejkalohen përmes karakterit dhe vlerave që, sipas tij, e kanë shoqëruar gjithmonë LDK-në.
Kjo vjen pasi degët e LDK-së në Pejë, Lipjan dhe Shtime kanë kërkuar largimin e tij nga drejtimi i partisë, ndërsa ai ka garantuar se nuk do të ketë ndarje në LDK.
“Në jetë duhet pasur vullnet dhe durim; të mirat vijnë pastaj”, ka shkruar Abdixhiku.
Ai tha se mbështetja e marrë nga strukturat dhe aktivistët e partisë është më e madhe sesa mund të kërkonte ai dhe LDK-ja.
“E kuptoj se anëtarësia jonë është e shqetësuar. Por sonte ju ftoj në durim. Ka momente kur padrejtësia duket më e madhe se mundi ynë; por janë pikërisht ato momente që e provojnë karakterin tonë. Ky karakter do t’i tejkalojë llogaritë e vogla; siç i ka tejkaluar gjithëherë”, ka deklaruar Abdixhiku.
