Doha, 2 prill Zhurnal.mk – Mbretëria e Bashkuar do të mbledhë 35 vende për të eksploruar mënyrat për të rihapur ngushticën e Hormuzit, rrugën jetësore të transportit detar për naftën dhe gazin që është bllokuar nga Irani.
Raportohet se pjesë e takimit do të jetë edhe Kosova. Kryeministri britanik, Keir Starmer, tha se faza tjetër e diskutimeve në përpjekjet e përbashkëta britanike dhe franceze për të siguruar rrugën ujore do të mbahet të enjten, me Yvette Cooper, Sekretaren e Jashtme, së bashku me udhëheqësit ndërkombëtarë.
Presidenti amerikan, Donald Trump, ka deklaruar se do të jetë detyrë e vendeve të tjera ta bëjnë ngushticën të sigurt nëse SHBA-të ndërpresin sulmet ndaj Teheranit, duke kritikuar mungesën e mbështetjes nga vendet evropiane për luftën e tij në Iran.
Starmer njoftoi se takimi do të bashkojë 35 vende për të “vlerësuar të gjitha masat e zbatueshme diplomatike dhe politike për të rivendosur lirinë e lundrimit, për të garantuar sigurinë e anijeve dhe marinarëve të bllokuar dhe për të rifilluar lëvizjen e mallrave jetësore”.
Pjesëmarrësit në takim përfshijnë nënshkruesit e një deklarate të përbashkët mbi Ngushticën e Hormuzit të bërë më 19 mars dhe ata që i janë bashkuar deklaratës që atëherë: Mbretëria e Bashkuar, Franca, Gjermania, Italia, Holanda, Japonia , Kanadaja, Republika e Koresë, Zelanda e Re, Danimarka, Letonia, Sllovenia, Estonia, Norvegjia, Suedia, Finlanda, Çekia, Rumania, Bahreini, Lituania, Australia, Emiratet e Bashkuara Arabe, Portugalia, Trinidad dhe Tobago, Kroacia, Bullgaria, Kosova, Panamaja , Maqedonia e Veriut, Nigeria, Mali i Zi, Shqipëria, Ishujt Marshall, Kili dhe Moldavia.
Ndryshe, kjo do të jetë hera e parë që vendet mbledhen për të diskutuar një plan të zbatueshëm për të rihapur ngushticën.
