Prishtinë, 4 gusht, Zhurnal.mk – Kryeprokurori i Shtetit, Zejnulla Gashi, së bashku me Drejtoreshën Ekzekutive të Institutit të Bazelit për Qeverisje, Elizabeth Andersen, dhe Drejtorin e Qendrës Ndërkombëtare për Rikthimin e Pasurive (ICAR), Iker Lekuona, kanë nënshkruar një marrëveshje bashkëpunimi për forcimin e përpjekjeve në rikthimin dhe riatdhesimin e pasurive të përfituara në mënyrë të paligjshme jashtë Kosovës.
Marrëveshja synon të fuqizojë bashkëpunimin me autoritetet e shteteve të tjera për gjurmimin, identifikimin dhe konfiskimin e pasurive të paligjshme, duke rritur efikasitetin në luftën kundër korrupsionit, pastrimit të parave dhe krimit të organizuar.
Instituti i Bazelit do të ofrojë mbështetje strategjike dhe teknike për Prokurorin e Shtetit në proceset e sekuestrimit dhe konfiskimit të pasurive, në përputhje me standardet më të larta të bashkëpunimit ndërkombëtar.
Komunikata e plotw:
Kryeprokurori i Shtetit, Zejnulla Gashi, Drejtoresha Ekzekutive e Institutit të Bazelit për Qeverisje në Zvicër (IBQ), Elizabeth Andersen, dhe Drejtori i Qendrës Ndërkombëtare për Rikthimin e Pasurive (QNRP – ICAR), Iker Lekuona, kanë nënshkruar marrëveshje bashkëpunimi në formë elektronike, e cila synon të çojë përpara përpjekjet për rikthimin dhe riatdhesimin e pasurive që janë fituar në mënyrë të paligjshme përmes korrupsionit ose formave të tjera të abuzimit me pushtetin, të cilat gjenden jashtë vendit dhe i përkasin ligjërisht Republikës së Kosovës.
Për më tepër, kjo marrëveshje bashkëpunimi synon të mbështesë lehtësimin e një bashkëpunimi më efektiv me autoritetet e shteteve të tjera në lidhje me gjurmimin, identifikimin dhe ndjekjen penale të pasurive të fituara në mënyrë të paligjshme, me qëllim rritjen e efikasitetit në luftimin e korrupsionit, pastrimit të parave dhe krimit të organizuar.
Gjithashtu, përmes këtij bashkëpunimi, Instituti i Bazelit për Qeverisje, nëpërmjet këshillave strategjike, udhëzimeve praktike dhe ndihmës, do ta mbështesë Prokurorin e Shtetit në çështjet e sekuestrimit dhe konfiskimit të pasurive të paligjshme, sipas standardeve dhe praktikave më të larta të bashkëpunimit ndërkombëtar.
