Shkup, 3 shkurt – Ministrat përkatës nga Ballkani Perëndimor do të zhvillojnë sot takim online me përfaqësuesit e Komisionit Evropian (KE) për të diskutuar problemin me të cilin përballen operatorët e transportit nga rajoni në lidhje me qëndrimin e tyre në zonën Shengen.
Në takim do të marrin pjesë ministrat e brendshëm, të transportit dhe të çështjeve evropiane nga vendet e Ballkanit Perëndimor, dhe nga ana tjetër do të jenë përfaqësues të drejtorive të përgjithshme të Komisionit Evropian për zgjerimin dhe partneritetin lindor, lëvizshmërinë dhe transportin dhe migracionin dhe punët e brendshme.
Ministri i Transportit Aleksandar Nikolloski tha të premten se ishte optimist se një marrëveshje për qëndrimin e operatorëve të transportit në zonën Shengen do të arrihej në takimin që KE ka planifikuar për sot me ministrat nga gjashtë vendet e Ballkanit Perëndimor. Megjithatë, siç tha ai, edhe nëse marrëveshja do të arrihej sot, do të duhej kohë që ajo të fillonte të zbatohej sepse duhet të votohet nga anëtarët e zonës Shengen dhe KE.
Zëdhënësi i Punëve të Brendshme të KE-së, Markus Lammert, tha të premten se Komisioni është në dijeni të shqetësimeve të shprehura nga operatorët e transportit nga Ballkani Perëndimor, se po e monitoron nga afër situatën dhe është në kontakt me partnerët nga rajoni.
