Shkup, 30 tetor, Zhurnal.mk – Ndryshimi i pushtetit në Serbi nuk duhet të ndikojë në realizimin e projekteve infrastrukturore ndërmjet Maqedonisë së Veriut dhe Serbisë, veçanërisht në fushën e transportit hekurudhor, vlerëson zëvendëskryeministri dhe ministri i Transportit, Aleksandar Nikolloski.
Në konferencën e përbashkët për media me zëvendëskryeministrin e Malit të Zi, Filip Ivanoviq, Nikolloski theksoi se bëhet fjalë për projekte strategjike që tejkalojnë mandatet e qeverive dhe janë në interes të të gjithë rajonit.
Si prioritet ai veçoi Korridorin 10, ku është planifikuar ndërtimi i një pikëkalimi të përbashkët hekurudhor kufitar në Tabanoc, si dhe i një linje të shpejtë hekurudhore. Për pikëkalimin kufitar tashmë është siguruar grant nga Bashkimi Evropian, ndërsa si realizues është përzgjedhur kompania maqedonase “Granit”.
Nikolloski pret që punimet të zhvillohen sipas dinamikës së paraparë dhe pikëkalimi të përfundojë deri në fund të vitit të ardhshëm, pas së cilës do të vihet në funksion. Ai theksoi se pikëkalimi i përbashkët do të mundësojë tranzit më të shpejtë, veçanërisht për transportin hekurudhor të mallrave.
Sipas tij, Serbia ka interes të vazhdojë zhvillimin e Korridorit 10, pasi ai përfaqëson lidhjen natyrore me Detin Egje, si dhe me portet e Selanikut dhe Athinës. Si shembull të vazhdimësisë së projekteve strategjike infrastrukturore pavarësisht ndryshimeve politike, ai përmendi nisjen e paralajmëruar të linjës së shpejtë hekurudhore Beograd-Budapest-Vjenë më 13 dhjetor.
Nga ana tjetër, zëvendëskryeministri i Malit të Zi, Filip Ivanoviq, vlerësoi se është ende herët për të folur për hapat e parë të pushtetit të ri në Serbi. Sipas tij, fituesve të zgjedhjeve duhet t’u lihet kohë për të formuar institucionet dhe qeverinë, si dhe për të përcaktuar prioritetet e tyre politike.
Ivanoviq shtoi se Mali i Zi synon të ruajë marrëdhënie të mira me Serbinë dhe se ndërtimi i autostradës nga Tivari deri në kufi, e cila pritet të lidhet me autostradën në territorin serb drejt Beogradit, është në interes të të dyja shteteve.
