Tel Aviv, 27 tetor, Zhurnal.mk – Pjesëmarrja në zgjedhjet në Izrael raportohet të jetë në nivelin më të lartë që nga viti 1981, ndërsa qytetarët votojnë në një proces që konsiderohet nga shumëkush si një nga më të rëndësishmit në historinë e vendit.
Gara po zhvillohet në një klimë të tensionuar politike, ku demokracia, siguria dhe e ardhmja e qeverisjes janë ndër çështjet kryesore, transmeton Telegrafi.
Sondazhet e publikuara të premten sugjerojnë se kryeministri aktual, Benjamin Netanyahu, dhe ish-shefi i ushtrisë, Gadi Eisenkot, janë pothuajse në barazim në garën për postin e kryeministrit.
Megjithatë, parashikimet tregojnë se asnjëri prej dy blloqeve politike nuk pritet të sigurojë 61 vendet e nevojshme në parlament për të formuar shumicën qeverisëse. Kjo mund të çojë në javë ose muaj negociatash dhe përpjekjesh për krijimin e një koalicioni.
Fushata është përqendruar te çështjet e demokracisë dhe sigurisë, ndërsa zgjedhjet shihen gjerësisht edhe si një referendum mbi udhëheqjen e Netanyahut.
Sistemi zgjedhor proporcional i Izraelit ka bërë që qeveritë të formohen gjithmonë përmes koalicioneve, ku partitë me qëndrime të ndryshme ideologjike bashkohen për të siguruar shumicën parlamentare. Në këtë proces, aleancat e papritura kanë luajtur shpesh rol vendimtar.
Eisenkot, i cili drejton partinë e sapoformuar Yashar, është figura kryesore e të ashtuquajturit “blloku i ndryshimit”. Ky grup përfshin parti me dallime të konsiderueshme politike, por që kanë si objektiv të përbashkët largimin e Netanyahut nga pushteti.
Në këtë bllok bëjnë pjesë edhe ish-kryeministri Naftali Bennett dhe Avigdor Lieberman, të dy politikanë të së djathtës që mbajnë qëndrime të ashpra për çështjet e sigurisë, si dhe Yair Golan, një ish-gjeneral me prirje të majta.
Bashkëpunimi mes tyre tregon se kundërshtimi ndaj Netanyahut ka bashkuar aktorë politikë që në çështje të tjera kanë dallime të mëdha.
Për Netanyahun, një prej figurave më jetëgjata në politikën izraelite, i cili mori për herë të parë postin e kryeministrit në vitin 1996, rikthimi në pushtet do të varet nga mundësia për të krijuar sërish një aleancë me partitë e së djathtës ekstreme dhe partitë ultraortodokse. Këto forca përbëjnë koalicionin e tij aktual qeverisës, të cilësuar si më i djathti në historinë e Izraelit.
Rezultati përfundimtar pritet të përcaktojë jo vetëm se kush do ta udhëheqë qeverinë e ardhshme, por edhe se cilat aleanca do të jenë të mundshme në një parlament ku asnjë bllok nuk pritet ta ketë shumicën i vetëm.
