Romë, 21 korrik, Zhurnal.mk – Autoritetet italiane sekuestruan 770 kilogramë kokainë “ekstra të pastër” në portin e Vado Ligure, në veriperëndim të Italisë, bëri të ditur sot Policia Financiare italiane dhe autoritetet doganore.
Sipas një njoftimi zyrtar, ngarkesa e madhe e drogës ishte fshehur me kujdes mes dhjetëra paletave me banane, brenda një kontejneri frigoriferik që kishte mbërritur nga një prej porteve kryesore të Ekuadorit.
Autoritetet vlerësojnë se sasia e sekuestruar do të kishte një vlerë prej rreth 250 milionë eurosh në tregun e paligjshëm.
Sipas autoriteteve italiane, kjo është një nga operacionet më të rëndësishme kundër trafikut të drogës të zhvilluara në vitet e fundit në portin e Vado Ligures.
Më pak se tre javë më parë, forcat e rendit kishin sekuestruar në të njëjtin port edhe 340 kilogramë kokainë, me një vlerë të vlerësuar rreth 120 milionë euro në tregun e paligjshëm.
