Shkup, 29 nëntor – Koalicioni VLEN sot ka reaguar ndaj ngjarjeve që ndodhën gjatë festimit të 28 nëntorit në vend, nga ku thonë se atmosfera festive i ka penguar destabilizuesve të vendit.
“Pas një dite festive si asnjëherë me parë më 28 Nëntor, teksa jehonte kënga e vallja shqipe gjithandej vendit, mesa duket kjo atmosferë festive nuk u shkoi përshtati atyre që u prish rahatia nga karriget e pushtetit. Në fund të ditës u lajmëruan këto qarqe të cilat dëshirojnë destabilizimin e vendit. Jo, se e duan shtetin, por se u mungon pushteti”, thonë nga VLEN.
Ndjejmë përgjegjësi dhe apelojmë deri tek të gjithë qytetarët që të tregojnë maturi dhe vendosmëri që të mos bien pre e provokimeve dashakeqe. Mos lejoni të viktimizoheni nga askush e aq më pak nga ata që nuk dëgjonin e shihnin hallet e juaja. Ne besojmë në vetëdijen e lartë të qytetarëve tanë që do të tregohen vigjilent e nuk do të instrumentalizohen nga ata që pas humbjes së pushtetit e kanë humbur edhe rrugën në oborr.
Ne kujdesimi për sigurinë e qytetarëve tanë, për stabilitetin e shtetit, prandaj paralajmërojmë për kujdes maksimal të të gjithë qytetarëve pa dallim që mos të bëjnë akte nga të cilat nuk mund t’i shpëtojë askush. E për këtë kemi dëshmi mjaftueshëm nga e kaluara.
Festat e tilla, shtojnë nga atje, simbolizojnë tolerancën dhe mirëkuptimin e ndërsjellë, prandaj dje qytetarët shqiptarë festuan në formën më të mirë të mundshme, në shkolla, sheshe, e në kryeqytet, me flamuj të mbështjellë rreth qafës e buzëqeshje gjithandej.
