Shkup, 19 tetor, Zhurnal.mk – Më shumë se 50 hektarë tokë bujqësore të mbuluar me vegjetacion të lartë të thatë u përfshinë nga zjarri që shpërtheu mbrëmë në territorin e Komunës së Debërcës, në segmentin nga Bellçishta drejt fshatrave Leshan dhe Zllestë.
Në shuarje ka intervenuar Njësia Territoriale e Zjarrëfikësve të Ohrit me tre automjete të zjarrëfikësve, së bashku me ekipin e “Entuziast Debërca”. Intervenimi zgjati deri në orët e vona të natës, ndërsa zjarri u pengua të përhapej drejt parcelave private të mbjella me misër dhe një centrali fotovoltaik.
Kryetari i Komunës së Debërcës, Zllatko Siljanoski, theksoi rrezikun e përhapjes së zjarrit dhe mundësinë që ai të shkaktonte pasoja shumë më të mëdha.
Siljanoski, i cili ishte në terren gjatë ndërhyrjes, u bëri apel banorëve të komunës që të ndalojnë djegien e hamulloreve, duke theksuar se një sjellje e tillë përbën kërcënim serioz për njerëzit, pronën dhe natyrën.
