Washington/Prishtinë, 1 Maj, Zhurnal.mk – Tre anëtarë të kongresit të SHBA-së kanë paraqitur një propozim rezolute në Dhomën e Përfaqësuesve, duke u bërë thirrje katër vendeve evropiane që ta njohin Kosovën, duke i kërkuar gjithashtu qeverisë së Donald Trump t’i inkurajojë ato ta bëjnë këtë, për të hapur rrugën për anëtarësimin e Kosovës në organizatën perëndimore të aleancës ushtarake, raporton dtt-net.com.
Kongresmeni Keith Self tha në një komunikatë për shtyp se së bashku me kongresmenin Ritchie Torres dhe kongresmenin Mike Lawler prezantuan “Rezolutën që mbështet Integrimin e Kosovës në NATO”.
“Rezoluta pohon se qeverisja demokratike e Kosovës, mbikëqyrja civile e forcave të sigurisë dhe bashkëjetesa multietnike tregojnë një rast bindës për anëtarësimin në NATO. Për më tepër, ndërsa forcat kundërshtare vazhdojnë të destabilizojnë rajonin, shtimi i Kosovës në aleancën e NATO-s do të shërbente si një kundërpeshë e nevojshme për të dekurajuar përpjekje të tilla armiqësore dhe për të parandaluar një katastrofë tjetër globale që të shpaloset në Ballkan”, thuhet në komunikatë.
Kosova e shpalli pavarësinë në vitin 2008, por këto katër vendet evropiane, të cilat janë anëtare të NATO-s, nuk e kanë bërë këtë, gjë që bllokon anëtarësimin e Kosovës.
Të tre ligjvënësit kujtuan se mungesa e njohjes unanime nga krejt vendet e NATO-s të pavarësisë së Kosovës “mbetet një pengesë qendrore për integrimin e saj në Aleancë”.
“Meqenëse NATO vepron me konsensus, kjo mungesë njohjeje paraqet një pengesë të konsiderueshme për aftësinë e Kosovës për të përparuar zyrtarisht drejt anëtarësimit, duke përfshirë pjesëmarrjen në mekanizmat kryesorë të pranimit, siç janë Partneriteti për Paqe [PfP] dhe Plani i Veprimit për Anëtarësim”, thuhet në komunikatë.
Kosova ka aplikuar për programin PfP në vitin 2012, por për shkak të katër vendeve që nuk e kanë njohur, asaj i mohohet edhe pjesëmarrja në këtë program.
“Rezoluta e kongresmenit Self i nxit këta katër aleatë të rishqyrtojnë qëndrimet e tyre, duke theksuar se njohja më e gjerë e Kosovës është thelbësore për të zhbllokuar rrugën e saj drejt integrimit në NATO dhe për të mbyllur një boshllëk strategjik në Evropën Juglindore që kundërshtarët kërkojnë ta shfrytëzojnë”, thuhet në komunikatë.
“Shtimi i Kosovës në aleancë është thelbësor për të kundërshtuar ndikimin në rritje të kundërshtarëve në Evropë. Shtetet e Bashkuara duhet të inkurajojnë Greqinë, Rumaninë, Sllovakinë dhe Spanjën të rishqyrtojnë qëndrimet e tyre dhe të sigurojnë që Kosova të ketë një rrugë të besueshme dhe të arritshme drejt anëtarësimit. Shtimi i Kosovës në aleancën e NATO-s është thelbësor për të mbrojtur interesat e sigurisë kombëtare të Shteteve të Bashkuara në Evropën Juglindore”, përfundon kongresmeni Keith Self në komunikatë.
NATO ka 4767 ushtarë në Kosovë, nga të cilat 590 nga SHBA-të, për të ruajtur stabilitetin në vend dhe paqen e brishtë në rajonin e Ballkanit Perëndimor, për shkak të tensioneve të vazhdueshme me Serbinë.
Për shkak të mosnjohjes nga të katër vendet si dhe Qiproja, Kosovës po i mohohet edhe anëtarësimi në Bashkimin Evropian.
Autoritetet e Kosovës kanë aplikuar për hyrje në BE në dhjetor 2022, por për shkak të pesë vendeve mosnjohëse, kërkesa nuk po trajtohet fare që atëherë. / Zhurnal.mk.
