Një plagosje me armë ka ndodhur në orët e para të mëngjesit të së hënës në fshatin Markat, bashkia Konispol. Saimir Haxhi, 44 vjeç, banor i këtij fshati, është qëlluar me armë zjarri tip çifte dhe ka pësuar plagë në pjesën e pasme.
Nga hetimet paraprake, dyshohet se Haxhi ka tentuar të vjedhë në një shtëpi të fshatit, dhe gjatë kësaj tentative është goditur me armë nga një person i paidentifikuar. Saimir Haxhi është një person me precedentë penalë.
Ngjarja ka ndodhur rreth orës 2 të natës. Pas plagosjes, ai është transportuar në Spitalin e Sarandës për ndihmë mjekësore dhe më pas është dërguar me urgjencë në Spitalin e Vlorës për trajtim të specializuar.
Policia e Sarandës ka mbërritur në vendngjarje dhe ka nisur hetimet për zbardhjen e plotë të ngjarjes. Për momentin nuk ka të dhëna për ndalimin e autorit të plagosjes.
Njoftim i policisë:
Më datë 07.07.2025, rreth orës 03:45, është paraqitur në spitalin e Sarandës shtetasi S. H., 44 vjeç, banues në fshatin Markat, i dyshuar i dëmtuar me armë gjahu në këmbë, jashtë rrezikut për jetën. Ky shtetas ka deklaruar se është qëlluar aksidentalisht në këmbë nga një gjuetar i paidentifikuar, në zonën ndërmjet fshatrave Shalës–Vagalat, Bashkia Konispol.
Nga verifikimet 44-vjeçari rezulton i shpallur në kërkim për veprën penale “Keqtrajtim i të miturve”.
Grupi hetimor vijon punën për sqarimin e plotë të rrethanave të ngjarjes, identifikimin e personave të tjerë të mundshëm të përfshirë, si dhe për verifikimin e deklarimeve të dhëna nga ky shtetas. /Euronews/
