Uashington, 13 maj Zhurnal.mk – Presidenti amerikan Donald Trump minimizoi dallimet me presidentin kinez, Xi Jinping lidhur me luftën në Iran, përpara vizitës së tij në Pekin.
I pyetur se çfarë mesazhi kishte për Xi lidhur me konfliktin, Trump tha se të dy do të zhvillojnë “një bisedë të gjatë” për këtë çështje.
“Mendoj se ai ka qenë relativisht i mirë, për të qenë i sinqertë me ju”, u tha Trump gazetarëve.
Presidenti Trump iu referua gjithashtu bllokadës detare të vendosur ndaj Iranit, duke deklaruar se “nuk ka pasur problem”, edhe pse Kina merr një pjesë të madhe të naftës së saj nga ajo zonë.
Mbështetja e Pekinit për Teheranin mbetet një pikë tensioni mes Uashingtonit dhe Pekinit.
Së fundmi, Departamenti amerikan i Thesarit ka vendosur disa raunde sanksionesh ndaj kompanive kineze të akuzuara për tregti të paautorizuar me Iranin.
Masat kanë goditur, ndër të tjera, rafineritë që blejnë naftë iraniane, një burim jetik të ardhurash për Teheranin.
Kina konsiderohet blerësi më i madh i naftës iraniane, ndërsa SHBA-ja po përpiqet të rrisë presionin ndaj udhëheqjes iraniane përmes një bllokade detare.
Presidenti Trump tha se ka marrëdhënie shumë të mira me Xi Jinping dhe e cilësoi vizitën e ardhshme në Kinë si “shumë emocionuese”.
Ai shtoi se “do të ndodhin shumë gjëra të mira”.
I pyetur nëse Xi mund të ndihmojë për zgjidhjen e konfliktit me Iranin, Trump u përgjigj se “nuk mendonte se kemi nevojë për ndihmë me Iranin”.
Përpjekjet diplomatike për një marrëveshje paqeje në luftën që vazhdon prej më shumë se dy muajsh kanë ngecur.
Një nga çështjet kryesore mbetet programi bërthamor iranian dhe rezervat prej rreth 440 kilogramësh uranium të pasuruar në nivelin 60%, që mund të përdoret për prodhimin e armëve bërthamore nëse përpunohet më tej.
