Paris, 18 gusht Zhurnal.mk – Franca ka vendosur të dëbojë dy diplomatë iranianë në ditët e ardhshme, duke thelluar përplasjen diplomatike me Teheranin.
Ministri i Jashtëm francez, Jean-Noël Barrot, e bëri të ditur masën përmes një postimi në platformën X. Sipas tij, vendimi është marrë në reagim ndaj një incidenti të regjistruar muajin e kaluar në Teheran, ku autoritetet iraniane ndaluan dy punonjës të ambasadës franceze.
Njoftimi i Parisit erdhi një ditë pasi Ministria e Jashtme e Iranit deklaroi se dy punonjësit francezë të ambasadës në Teheran, të përfshirë në këtë përplasje, nuk do të lejoheshin të riktheheshin në Iran.
Autoritetet franceze pretendojnë se gjatë muajit të kaluar punonjësit e ambasadës u ndaluan dhe u kërcënuan nga pjesëtarë të strukturave iraniane të sigurisë. Franca e ka cilësuar ngjarjen si të papranueshme dhe si shkelje të imunitetit diplomatik.
Teherani, nga ana tjetër, pretendon se dy shtetasit francezë ishin angazhuar në veprimtari në mbështetje të shoqërisë civile iraniane. Sipas autoriteteve iraniane, një aktivitet i tillë përbën ndërhyrje në çështjet e brendshme të vendit dhe shkelje të Konventës së Vjenës.
Masat e ndërsjella ndaj personelit diplomatik tregojnë një përkeqësim të mëtejshëm të marrëdhënieve mes Francës dhe Iranit.
