Shkup, 11 shtator Zhurnal.mk – Me rastin e Ditës së Agjencisë për Siguri Kombëtare (ASK), është promovuar filmi dokumentar me titull “Rojet e heshtjes”, i cili rrëfen historinë e zhvillimit të Shërbimit të Sigurisë, nga themelimi i OZNA-s në vitin 1944, përmes UDB-së, SDB-së dhe strukturave të sigurisë në Maqedoninë e pavarur, deri te themelimi i Agjencisë për Siguri Kombëtare në vitin 2019.
Përmes materialeve arkivore, dëshmive dhe rikonstruksioneve vizuale, filmi trajton edhe punën e shërbimit bashkëkohor të sigurisë dhe sfidat me të cilat përballet shteti sot.
Fokus i veçantë i kushtohet tri fushave të rëndësishme të punës së Agjencisë: kundërterrorizmit, kundërzbulimit dhe luftës kundër krimit të organizuar dhe formave të larta të korrupsionit.
“Rojet e heshtjes” sjell edhe dëshmi personale nga ish-operativë dhe operativë aktualë, të cilët flasin për natyrën e punës, përgjegjësinë dhe sfidat që në shumicën e rasteve mbeten larg syrit të publikut.
Siç theksohet në film, rezultatet më të mëdha të kësaj pune shpesh janë pikërisht ato që nuk shihen, por që bëjnë dallimin.
Në fund të filmit janë paraqitur edhe deklarata të bartësve të funksioneve të larta shtetërore dhe drejtuesve të institucioneve me të cilat bashkëpunon ANB-ja. Ata flasin për rëndësinë e partneritetit dhe përpjekjeve të përbashkëta në përballjen me sfidat, si dhe urojnë përvjetorin e Agjencisë.
“Filmi është një përpjekje që, përmes një qasjeje të rrallë të parë deri më tani, puna e Shërbimit të Sigurisë t’i afrohet publikut dhe të paraqitet roli i tij në mbrojtjen e shtetit dhe qytetarëve të tij. ‘Rojet e heshtjes’ është një histori për të kaluarën, punën dhe njerëzit që qëndrojnë pas sigurisë së shtetit”, thonë nga Agjencia.
