Shkup, 30 shtator, Zhurnal.mk – Nënkryetari i Kuvendit, Antonio Miloshoski, mbajti fjalë në hapjen e Konferencës Rajonale për parandalimin e korrupsionit dhe vlerësimin e rreziqeve të korrupsionit në Ballkanin Perëndimor, e cila po zhvillohet në Shkup. Ngjarja bashkon përfaqësues të institucioneve nga rajoni dhe partnerë ndërkombëtarë me synim forcimin e integritetit dhe mbrojtjen e interesit publik.
Në fjalimin e tij, Miloshoski theksoi se parandalimi i korrupsionit kërkon njohjen e hershme të rreziqeve dhe që gjetjet e institucioneve kompetente të çojnë në masa konkrete. Ai veçoi rëndësinë e transparencës në shpenzimin e mjeteve publike, ndjekjen e rekomandimeve të auditimit dhe identifikimin e pikave të ndjeshme në prokurimet publike.
Duke u ndalur tek bashkëpunimi institucional, nënkryetari kujtoi rolin e Kuvendit dhe bashkëpunimin me Entin Shtetëror të Auditimit, duke rikujtuar Memorandumin e nënshkruar në vitin 2022. Ai gjithashtu theksoi rëndësinë e Projektligjit të ri për auditimin shtetëror, i cili është në procedurë parlamentare dhe parashikon transparencë më të madhe të raporteve dhe mbikëqyrje më të fortë parlamentare.
