Tiranë, 08 tetor, Zhurnal.mk – Ministri i Punëve të Brendshme, Ervin Demo, theksoi sot rëndësinë e decentralizimit dhe forcimit të pushtetit vendor, duke nënvizuar se suksesi i reformës territoriale duhet të matet nga përmirësimi i shërbimeve për qytetarët.
Demo nënvizon se reforma duhet të shoqërohet me një analizë të detajuar të funksioneve dhe përgjegjësive të bashkive, me qëllim identifikimin e problematikave dhe forcimin e kompetencave vendore.
“Reforma territoriale ka një qëllim të qartë: bashki më të forta, shërbime më të mira dhe institucione më pranë qytetarëve. Suksesi i saj do të matet jo vetëm me ndryshimet institucionale, por mbi të gjitha me rezultatet konkrete në jetën e përditshme të çdo komuniteti.
“Reforma territoriale duhet të shoqërohet me një proces të qartë decentralizimi, për të ndërtuar bashki më të forta, më funksionale dhe më pranë qytetarëve. Përpara nesh është një punë e rëndësishme që duhet të nisë me një analizë të detajuar të funksioneve dhe përgjegjësive të bashkive: çfarë funksionon, çfarë duhet përmirësuar, cilat kompetenca duhen forcuar dhe cilat shërbime mund të ofrohen më mirë në nivel vendor”, shkruan Demo.
Sipas ministrit, decentralizimi nuk është thjesht transferim kompetencash, por ai duhet të shoqërohet me burime financiare, kapacitete administrative dhe mekanizma të qartë llogaridhënieje.
“Synimi ynë është një pushtet vendor me më shumë autonomi, por edhe me më shumë përgjegjësi për cilësinë e shërbimeve që u ofron qytetarëve”, theksoi Demo.
Demo shtoi se suksesi i reformës nuk do të matet me numrin e bashkive apo me ndryshimet në hartë, por me atë që ndryshon realisht në jetën e qytetarëve.
